Një ndeshje tenisi në Doha të Katarit ka bërë zhurmë të madhe në internet. Në këtë sfidë ishin përballë njëri-tjetrit Kojakul i Tajlandës (numri 1367 në renditjen botërore) me Bahmet të Ukrainës, për të cilin ishte ndeshja e parë zyrtare në karrierë.
Bahmet ishte në prej “alternativave” që regjistrohen duke paguar rreth 65 euro në pritje të hapjes së një vendi nga mosparaqitjet e profesionistëve.
Takimi ra në sy pasi tenisti nga Tajlanda i fitoi të dy setet 6-0 pa i lënë asnjë pikë të vetme kundërshtarit dhe po të shihet video, kuptohet qartësisht pse. Pamjet e filmuara gjatë turneut tregojnë Bahmet që nuk arrinte as t’i binte topit, duke treguar një nivel amator që normalisht nuk duhej të pranohej në turne që bën pjesë në listën e atyre ndërkombëtare.
Sikur të mos mjaftonte kjo, ndeshja është shfaqur në televizion dhe shumëkush ka vënë baste në rezultate live dhe përfundimin e saj, duke bërë që të lindin dyshime shumë të mëdha se gjithçka ka qenë e organizuar për të trukuar këtë sfidë e për të përfituar financiarisht nga ajo pasi ishte e pamundur që të kishte realisht pjesëmarrës në turne të një niveli kaq të ulët.
