Ekipi i basketbollit të meshkujve të Vllaznisë vazhdon serinë e fitoreve të tij. Ai ka mundur sot pasditen, në kuadrin e javës së gjashtë të kampionatit, ekipin e Studentit me rezultatin 80-56. Ndeshja është luajtur në pallatin e sportit “Qazim Dervishi” dhe është dominuar nga fillimi e deri në fund nga basketbollistët shkodranë. Ata kanë fituar periodën e parë në shifrat 23-12 dhe epërsia ka ardhur duke u thelluar teksa kanë fituar edhe tre të tjerat me rradhë, në shifrat 17-13, 21-19 dhe 19-12. Me rezultatin e përgjithshëm 80-56. Epërsia prej 24 pikësh mbase do të kishte qenë edhe më e madhe por trajneri Bledar Gjeçaj ka vendosur t’u japë mundësinë të gjithë sportistëve për të luajtur. Me fitoren e sotme, Vllaznia siguron fitoren e gjashtë në po kaq ndeshje të luajtura duke qenë ndër ekipet kryesuese të kampionatit. Megjithatë, vështirësia më e madhe tashmë nis për këtë ekip sepse do nisin ballafaqimet me skuadrat rivale siç janë Tirana, Kamza Basket dhe Apolonia.www.shkodrasport.com
