Hearts po vazhdon të shkëlqejë në kampionatin skocez të futbollit dhe po kryeson me meritë renditjen pas javës së 11-të të tij. Ditën e djeshme ai ka fituar me rezultatin e thellë 4-0 ndaj Dundee United dhe në këtë fitore ka patur një kontribut të vogël edhe futbollisti shkodran Sabah Kerjota.
Ky i fundit është futur në lojë në minutat e fundit dhe ka luajtur 11 të tilla duke qenë më pas edhe ai pjesë e festës të skuadrës së tij. Kerjota është bashkuar këtë verë me Hearts duke ardhur nga skuadra italiane e San Benedetese dhe ky padyshim që është një kapërcim shumë i rëndësishëm në karrierën e tij.
Kuptohet që ardhja me vonesë tek ky ekip, ka patur ndikimin e vet sepse skuadra ka qenë e formuar tashmë. Për më tepër që ajo është duke bërë shumë mirë dhe trajneri Mcinnes e kishte patur formacionin e konfiguruar, megjithatë për asnjë moment nuk e ka lënë jashtë vëmendjes edhe sulmuesin e ardhur nga futbolli italian.
Ish- futbollisti i Akademisë Vllaznia deri më tani është aktivizuar në 5 ndeshje si zëvendësues dhe sigurisht që pret momentin e mirë për të qenë titullar nga minuta e parë. Këto tre muaj i kanë shërbyer atij për t’u ambientuar edhe me futbollin skoceez dhe në njëfarë mënyre po shijon suksesin e deritanishëm të Hearts.
Ajo jo vetëm ka sfiduar emra të tillë të mëdhenj të futbollit të këtij vendi si Celtic e Rangers, por në 11 javë kampionat ka arritur të fitojë 9 ndeshje dhe të barazojë 2 ndërkohë që nuk e njeh humbjen. Shanset janë të mëdha që Hearts sivjet të jetë kampione dhe kjo do të ishte një arritje e madhe edhe për Sabah Kerjotën, i cili pak muaj më parë u shpall kampion në Seria D të Italisë dhe tashmë e sheh veten në ligën e parë skoceze duke luajtur me ekipin kryesor pretendent për titull.(www.shkodrasport.com)
