Pak ditë më parë ai mbushi 36 vjeç, por kjo gjë nuk po e pengon atë të vazhdojë të bëjë atë që di të bëjë më mirë: Të shënojë në portat kundërshtare. Dhe tek Veleçiku duket se ka rigjetur veten sërish. Po shënon thuajse rregullisht në çdo ndeshje dhe tashmë është një nga kandidatët për “Këpucën e Artë” të kategorisë së dytë.
E kemi fjalën për sulmuesin shkodran Jurgen Gjini. Edhe dje në ndeshjen ndaj Sopotit, ndonëse një ballafaqim shumë i vështirë, ka qeenv pikërisht ai i cili hapi serinë e golave për skuadrën e tij në atë fitore 3-0, pasuar me golat e Marsel Rragamit dhe Ledion Hotajt.
Ky gol ishte i 14-ti për Gjinin në këtë kampionat dhe tashmë ai është i dyti në renditjen e golashënuesve më të mirë të kampionatit, pas një shkodrani tjetër, Jasmin Rraboshtës që kryeson renditjen me një gol më shumë.
Sulmuesi i koplikasve do të tentojë të shënojë edhe në dy ndeshjet e mbetura të kampionatit dhe pse jo të marrë vendin e parë në mes golashënuesve më të mirë të kampionatit, por edhe ta ndihmojë Veleçikun për të kapur zonën play-off.
Burimi: Gazeta “Shkodra Sport”
