Ekipi i Tërbunit zhvilloi një paraqitje shumë të mirë ndaj Sopotit, skuadrës së vendit të dytë në renditje. Me lojën e treguar në 45 minutat e para, dibranët nuk meritonin barazim, por fitore. Gjatë kësaj periudhe, Tërbuni pati disa raste të rrezikshme për gol, sidomos përmes Karajt dhe Hasës, të cilët u bënë protagonistë në dy golat e shënuar.
Rikthimi i Zabales tek Tërbuni, pas një periudhe stërvitore 10-ditore te Vllaznia, është një lajm i mirë për ekipin e Pukës. Ai është aktivizuar në të gjitha ndeshjet e fazës së parë dhe pritet të japë kontribut edhe në vazhdim. Gjithashtu, gjatë kësaj merkatoje, ekipi ka afruar një nigerian 23-vjeçar, sulmuesin shtatlartë Aruana, i cili pritet të forcojë repartin ofensiv.
Në një bisedë për “Panorama Sport”, kryetari i Bashkisë Pukë dhe njëherësh president i klubit, Rrok Dodaj, u shpreh: “Jam i kënaqur me paraqitjen e ekipit ndaj një kundërshtari si Sopoti i vendit të dytë. Kam besim se ky grup lojtarësh do të japë më të mirën deri në mbyllje të kampionatit, duke synuar ndeshjet e ‘play-off’-it. Me të vërtetë, ishim shumë pranë marrjes së tri pikëve, por një pakujdesi e vogël na detyroi të ndaheshim me barazim. Gjithsesi, i përgëzoj lojtarët për paraqitjen e shkëlqyer.
Gjatë merkatos së dimrit kemi bërë përpjekje të afrojmë tre lojtarë cilësorë dhe shpresojmë që të ambientohen sa më shpejt me ekipin dhe të tregojnë vlerat e tyre. Këtë fundjavë Tërbuni luan në transfertë ndaj Erzenit dhe duhet të japim maksimumin për të marrë rezultatin që synojmë.
Pas ndeshjes në Shijak, ekipi ka dy takime në fushën e vet, ndaj Gramshit dhe Veleçikut. Sa i përket meje, si kryetar bashkie dhe president i klubit, nuk do të kursej asgjë nga ana financiare për çdo nevojë që mund të kenë lojtarët”. Ekipi i Tërbunit u shpërblye nga drejtuesit për pikën e marrë ndaj Sopotit, duke treguar se puna dhe angazhimi i lojtarëve po vlerësohet.
