Shkruar nga Endri ÇINARI
Tashmë misioni është i qartë për Vllazninë. Në takimin e radhës përballë Partizanit, kuqeblutë do të kërkojnë me çdo kusht fitoren e parë të sezonit, në një sfidë që pritet të jetë e fortë dhe kërkuese. Pas dy barazimeve në dy javët e para të kampionatit, shkodranët duan të bëjnë hapin e radhës dhe të marrin tri pikët përpara tifozërisë së tyre.
Përballë do të jetë një kundërshtar i fortë dhe historik si Partizani. Përballjet mes dy skuadrave kanë qenë gjithmonë interesante dhe të luftuara, ndërsa edhe këtë herë pritet një duel me shumë rivalitet. Të dyja ekipet kanë pikë të përafërta në tabelë, por përshtypja e lënë në dy javët e para duket se favorizon disi Vllazninë.
Kuqeblutë kanë treguar rritje nga ndeshja në ndeshje dhe në javën e dytë kanë dhënë sinjale më të mira sa i përket lojës dhe organizimit të skuadrës. Kjo ka bërë që në Shkodër të rikthehet edhe optimizmi, ndërsa sfida me Partizanin shihet si mundësia ideale për ta konfirmuar këtë përmirësim edhe me një rezultat pozitiv.
Faktori fushë është një tjetër element që Vllaznia duhet ta shfrytëzojë maksimalisht. Përballë një kundërshtari të tillë, mbështetja e tifozëve në “Loro Boriçi” mund të jetë një shtysë e rëndësishme për skuadrën e Edi Martinit. Një stadium i mbushur do t’i jepte kuqebluve edhe më shumë energji për të kërkuar tri pikët.
Në këtë përballje Vllaznia ka mundësinë të tregojë edhe ambiciet e saj për këtë sezon. Një fitore ndaj Partizanit nuk do të sillte vetëm tri pikë të rëndësishme në renditje, por do të ishte edhe një sinjal për rivalët se shkodranët duan të jenë pjesë e garës për objektivat madhorë të kampionatit.
Prandaj, të shtunën në “Loro Boriçi” pritet një Vllazni me një mision të vetëm: fitoren. Pas dy barazimeve radhazi, kuqeblutë kërkojnë të bëjnë hapin e parë drejt një ecurie më ambicioze, ndërsa përballë Partizanit kanë mundësinë të tregojnë se janë gati të përballen me çdo rival dhe të luajnë një rol protagonist në kampionatin e ri.
Burimi: Gazeta “SHKODRA SPORT”
