Kategoria Superiore rezulton një “tokë e minuar” për trajnerët. Pasqyra reale është ajo çfarë ka ndodhur në 17 javët e para në këtë sezon, ku 10 trajnerë janë larguar. Mesatarisht i bie që në Superiore ikën një trajner pas çdo 1 jave e gjysmë.
Këtu s’llogariten trajnerët provizorë, që kanë drejtuar nga një apo dy ndeshje nga problemet e ndryshme të të parëve të pankinave. Presidentët e klubeve nuk janë të durueshëm, pasi i ndryshojnë pankinat për pak gjë. Tirana theu rekordin këtë vit, ku pas një fitoreje dhe një humbjeje largon trajnerin që u riktheu titullin pas 11 viteve, Emanuel Egbo. Valsin e pankinave e ka provuar deri tani gjysma e klubeve të Superiores.
Gjithçka nisi me Egbonë te Tirana për të përfunduar te Juljan Ahmataj. Vllaznia, Partizani, Teuta, Kastrioti dhe Bylisi janë skuadrat që i kanë mbetur besnik trajnerit me të cilin nisën sezonin. Sa u përket ndryshimeve në drejtim, rekordin e mban Apolonia me 3 trajnerë të larguar. Fillimisht ishte italiani Xhovani Kolela, më pas Nikolin Çoçlli ia la vendin trajnerit Bledar Borova, që e pasoi stafetën te Fabricio Kamarata.
Tirana e nisi me Emanuel Egbonë, që pas dy javësh u zëvendësua nga Nevil Dede, i cili u “dorëzua” disa minuta para ndeshjes së javës së 16-të me Laçin dhe drejtimi i mbeti në dorë drejtorit Tefik Osmani. Orges Shehi është trajneri tretë te bardheblutë. Laçi e nisi me Armando Cungun, por rezultatet e dobëta e larguan dhe në një situatë tranzitore ekipi u drejtua nga Stavri Nica dhe Klevis Hima, për t’ia lënë stafetën Shpëtim Duros.
Kukësi mbetet nga problematikët e stolit, ku e nisën me Skënder Gegën, që u shkëput pak nga infektimi me COVID dhe punën e vijoi Rraman Hallaçi, i cili e vijoi drejtimin edhe pas largimit përfundimtar të Gegës. Por, edhe ish-kapiteni hapi krahun për Mirel Josën. Julian Ahmataj është “dëshmori” i fundit dhe Skënderbeu tani i është besuar Migen Memellit. Natyrshëm pritet radha dhe lind pyetja: Kush do të jetë “dëshmori” i radhës nga trajnerët e Superiores?
TRAJNERËT E LARGUAR KËTË SEZON
TIRANA
Emanuel Egbo
Nevil Dede
KUKËSI
Skënder Gega
Rraman Hallaçi
LAÇI
Armando Cungu
Stavri Nica
APOLONIA
Xhovani Kolela
Nikolin Çoçlli
Bledar Borova
SKËNDERBEU
Julian Ahmataj
