Boksieri shqiptar Amar Koçi ka arritur një rezultat të mirë në Kampionatin Europian të 23 vjeçarëve që po zhvillohet në Hungari. Ai ka merituar medaljen e bronztë duke i dhuruar Shqipërisë një tjetër arritje në arenën ndërkombëtare.
Amar Koçi është një boksieri i ri dhe me shumë të ardhme. Ai është fitues i medaljes së argjendtë në Kampionatin Europian të 16 vjeçarëve tre vjet më parë dhe ndërkohë një vit më vonë u shpall kampion Ballkani për U18, ndërsa tani vjen medalja e bronztë në Europianin U23.
Paraqitja e tij ka qenë shumë e mirë duke i fituar të dy ndeshjet e para ndaj një boksieri ukrainas dhe një lituanezi, ndërsa në gjysmëfinale u ndesh me bullgarin William Cholov me të cilin humbi me rezultatin 2-3 pas një ndeshje shumë të luftuar.
Këtu është mbyllur rrugëtimi i boksierit shqiptar në këtë Europian, por gjithsesi medalja e bronztë që ai fitoi padyshim që është një arritje e madhe përr këtë sport.
