Atalanta ka regjistruar mbrëmë një rezultat historik, duke mundur Liverpulin në stadiumin legjendar “Anfield”, për më tepër me një rezultat bindës 3-0 në Ligën e Europës. Dy gola të Skamaka dhe një i Pasaliç i dhanë suksesin italianëve në duelin e sotëm.
Kështu, ajo u bë skuadra e tretë në histori e cila ka mundur më shumë se një herë Liverpulin në “Anfield” në ndeshjet europiane. Dy të parat janë Real Madrid dhe Barcelona, të cilave tashmë u shtohet edhe skuadra e Berat Gjimshitit.
Italianët i kishin mundur më parë anglezët në Ligën e Kampioneve në vitin 2020, por me një stadium të boshatisur nga tifozët për shkak të COVID.
Fitorja e sotme e bergamaskëve i jep gjithashtu fund një serie prej 33 ndeshjesh radhazi pa humbje në shtëpi për skuadrën e Klop, e cila kishte 13 muaj që nuk provonte shijen e disfatës para tifozëve të vet.
