Fiorentina po punon shumë seriozisht për të forcuar mesfushën e saj. Klubi nga Firence është interesuar që në fillim të merkatos për mesfushorin e Kombëtares shqiptare Nedim Bajrami.
Teksa palët nisën bisedimet nuk u gjet akoma një marrëveshje. Empoli është i fiksuar me një shifër prej 10 milionë eurosh dhe nuk do ta lëshojë fantazistin për më pak, ndërkohë që ditë më para në marrëveshje u përfol për një përfshirje të Zurkovskit, ndërsa dje siç ka shkruar “SKY Sport” dhe gazetari i njohur Xhanluka di Marcio, ka pasur kontakte të reja mes klubeve dhe menaxherit të futbollistit.
“Nedim Bajrami është emri në krye të listës për mesfushën e Fiorentinës. Ditët e fundit ka pasur kontakte të reja mes Fiorentinës dhe Empolit për mesfushorin shqiptar, pas interesimit në fillim të merkatos.
Në negociata Fiorentina i propozoi Empolit Nastasiçin, pasi skuadra e drejtuar nga Paolo Zaneti është në kërkim të një mbrojtësi”, shkruan Di Marcio. Fiore po përpiqet që të përfshijë një lojtar tjetër për të mos paguar shumën e plotë prej 10 milionë eurosh që kërkon presidenti i Empolit, Fabricio Korsi.
