✍️ Shkruar nga Gjergj KOLA
Besëlidhja merr një tjetër fitore në kampionat dhe rikthehet në krye të renditjes, megjithatë duhet pritur rezultati i nesërm i Shirokës në sfidën ndaj Gramshit, për të parë nëse lezhjanët do ta ruajnë sërish vendin e parë.
Ditën e sotme ata kanë luajtur në transfertë ndaj ekipit Luzi 2008 dhe kanë fituar me rezultatin e thellë 6-1. Gjithçka është bërë e lehtë për skuadrën e drejtuar nga trajneri shkodran Elvis Plori. Kjo sepse ajo ka kaluar shpejt në avantazh me anë të Dos Santos.
Po gjatë pjesës së parë, Besëlidhja do të shënonte edhe dy gola të tjerë, me të njëjtin autor- Akansase dhe si rrjedhojë do të shkonte në pushim me një avantazh 3-0 që fliste shumë për vazhdimësinë e ndeshjes.
Vendasit gjithsesi u munduan ta rihapin ndeshjen duke shënuar në minutën e 69-të me 11-metërsh me autor Jurgen Peqinin, por vetëm kaq sepse miqtë do të shënonin njëri pas tjetrit edhe tre gola të tjerë, po aq sa në pjesën e parë.
Dy prej tyre mbanin firmën e mesfushorit elbasanas Ardit Hila ndërsa do të kishte vend edhe për një gol të sulmuesit shkodran Jasmin Rraboshta që në këtë mënyrë do të kompletonin fitoren e thellë 6-1 të Besëlidhjes. Me fitoren e sotme ajo ngjitet e 19 pikëve, me 6 fitore dhe vetëm 1 barazim në 7 ndeshjet e luajtura deri më tani.
Burimi: Gazeta “Shkodra Sport”
