FUTBOLL

Pasditen e sotme Vllaznia ka zhvilluar miqësoren e saj të katërt. Ajo është ndeshur në Peqin ndaj Shkumbinit vendas të cilin e ka mundur me rezultatin 2-0. Autor i të dy golave në këtë ndeshje ka qenë rumuni Dragoi, nga një për secilën pjesë. Në këtë ndeshje ka patur 2-3 ndryshime në formacion në krahasim me ndeshjet e mëparshme. Kështu, në portë si gjithnjë ka qenë Vujadinoviç e po ashtu në mbrojtje treshja “e paprekur”  ka qenë ajo e përbërë nga Smajli, Beqiri dhe Osmani. Në krahun e majtë të mbrojtjes këtë herë është aktivizuar Begaj i cili e ka lënë tashmë plotësisht prapa dëmtimin që ka patur dhe është në dispozicion të stafit drejtues.

Sërish lëvizje tek Vllaznia. 18 ditë përpara nisjes së kampionatit të ri, skuadra shkodrane nuk po gjen qetësinë e duhur në merkato. Përpjekjet për ta stabilizuar 18-shen e saj nuk po arrijnë frutet e duhura. Pas Sykajt e Gocajt, ka qenë rradha e Hasanit për t’I dhënë lamtumirën asaj. Mesfushori 20 vjeçar kishte kohë që përflitej për një largim të mundshëm nga Vllaznia dhe tashmë duket se kjo do bëhet realitet. Kontrata e tij mbaron në janarin e vitit të ardhshëm megjithatë bordi drejtues I klubit, në mbledhjen e tij të djeshme ka vendosur që lojtari të lihet I lirë pasi t’I paguajë detyrimet Vllaznisë për formimin e deritanishëm.

Një tjetër lojtar mund të shtojë rradhët e Vllaznisë. Ai tashmë ka mbërritur, ka filluar stërvitjen dhe është gati të arrijë akordin dhe të firmosë me të. Bëhet fjalë për mbrojtësin shkodran Klodian Semina. Bjondi shtatëlartë ka mbërritur ditët e fundit nga Zvicra atje ku ka mbyllur kontratën me ekipin e Lokarnos dhe është vënë në kërkim të një skuadre tjetër. Në fakt, ka qenë Kastrioti skuadra e parë që ka shfaqur interes për këtë lojtar por duket se vetë Semina më shumë sesa për ndonjë skuadër tjetër, ka dashur të kthehet e të luajë për skuadrën e qytetit të tij- Vllazninë.

Trajneri Shpëtim Duro javën që shkoi ka deklaruar se Vllaznia mund të ishte në merkato edhe për dy futbollistë të tjerë por drejtuesit e klubit e kanë ngushtuar rrethin në vetëm një. Burime pranë drejtuesve shkodranë bëjnë të ditur se ata po kërkojnë të bëjnë më të mirën në merkato për gjetjen edhe të një sulmuesi tjetër cilësor ndërsa për mesfushorin nuk ka vend. Po kush do jetë sulmuesi? Kjo ende nuk dihet. Përpjekjet janë të shumta për të gjetur lojtarin e duhur.

Problemet që po has skuadra shkodrane në sulm, kanë bërë që drejtuesit e Vllaznisë të rihedhin sytë edhe njëherë nga argjentinasi Nestor Martinena. Ish-sulmuesi I Dinamos u pat vetëofruar jo shumë ditë më parë tek skuadra shkodrane përmes një miku të tij në Shqipëri por drejtuesit kuqeblu nuk shfaqën ndonjë dëshirë të madhe për të dhe nuk dihet pse. Ndoshta kanë qenë kërkesat e larta financiare të lojtarit, mbase edhe ndonjë opsion tjetër në merkato, por e sigurtë është që Vllaznia tashmë është “penduar” për këtë gjë.

Mesfushori i kombëtares shqiptare dhe i Tiranës, Klodian Duro ka vendosur ditën e djeshme, që përfundimisht, të qëndrojë në kryeqytet, me skuadrën ku bën pjesë aktualisht dhe ka edhe  një kontratë 1-vjeçare me të. Në këtë mënyrë ai ka thënë “jo” Vllaznisë, e cila ishte e gatshme për të bërë një sforco të madhe financiare, vetëm e vetëm, që ky futbollist të rikthehej dhe një herë në Shkodër, dhe kontributi i tij tek kuqeblutë në sezonin e ri do të ishte i dobishëm për të synuar trofe. Gjithçka është mbyllur dje në mesdite, ku drejtuesit e skuadrës shkodrane kanë patur edhe kontaktin e fundit me Duron për këtë çështje.

Vllaznia nuk ka arritur të fitojë as ndaj Besëlidhjes.Në miqësoren e luajtur pasditen e sotme në stadiumin "Loro Boriçi", është arritur rezultati i barabartë 1-1. Tre ndeshje miqësore, asnjë fitore për Vllazninë. Kjo është ecuria e deritanishme e saj në përgatitoren e sezonit të ri. Rezultate këto që sigurisht e kanë bërë të pakënaqur trajnerin Shpëtim Duro që kërkon më tepër nga skuadra e tij. Edhe dje ndaj Besëlidhjes në miqësoren e mbyllur në barazim 1-1, sërish shkodranët kanë çaluar në organizimin e lojës dhe në sulm.

Ndryshime në krye të klubit shkodran. Administratori I tij Kujtim Shaba merret vesh se nuk është më në këtë funksion. Vendimi është marrë nga drejtuesit e lartë të klubit. Por karrigia e tij nuk do mbesë shumë kohë bosh. Bashkia Shkodër do të emërojë në këtë post një person tjetër. Bëhet fjalë për një figurë të njohur në këtë qytet por jo të fushës së sportit. Ai është Fatos Gjyrezi, ish-nënkryetar I këtij institucioni vite më parë apo dhe Prefekt I Gjirokastrës. Gjyrezi vjen nga një familje me tradita sportive por vetë ai nuk është marrë me sport.

Ndryshime në krye të klubit shkodran. Administratori I tij Kujtim Shaba merret vesh se nuk është më në këtë funksion. Vendimi është marrë nga drejtuesit e lartë të klubit. Por karrigia e tij nuk do mbesë shumë kohë bosh. Bashkia Shkodër do të emërojë në këtë post një person tjetër emri i të cilit do bëhet publik në ditët e ardhshme. Në fakt, sa i takon largimit të shabës kishte kohë që diskutohej një çështje e tillë. Akuzat e shumta pavarësisht mbrojtjes që i ka bërë Bashkia, e ka bërë të pashmangshme një largim të tillë.

Edhe miqësorja e dytë nuk ka shkuar ashtu siç duhet për Vllazninë. Pasditen e sotme ajo nuk ka shkuar më tepër se tek barazimi 0-0 ndaj Adës. Ndeshja është luajtur në stadiumin “Loro Boriçi”  dhe është ndjekur nga një masë e madhe tifozësh të cilët kishin interes për të parë skuadrën e tyre në fushën e lojës. Megjithatë ajo çfarë kanë vërejtur, nuk ka qenë ajo që pritej. Skuadra e trajnerit Shpëtim Duro ka çaluar sidomos në manovrën sulmuese dhe në këtë mënyrë vërehen edhe njëherë tjetër problemet tek gjetja e golit. Mungesa e tij në dy miqësoret e zhvilluara së fundi, e vërteton më së miri këtë. Në ndeshjen e djeshme trajneri Duro ka hedhur në fushë të njëjtin formacion si në ndeshjen e para dy ditëve me Mornarin por me një ndryshim të vetëm. Në fushë ka qenë serbi Stasiç në vend të Hysës së dëmtuar por ai nuk ka bindur dhe do largohet nga Vllaznia.