Egnatia është e “zhytur” e gjitha në procesin e konfigurimit të skuadrës për aventurën europiane. Përpos bisedimeve që drejtuesit kanë nisur për të përforcuar ekipin me futbollistë të rinj, njëkohësisht po punojnë edhe për rinovimin e kontratave me disa lojtarë.
Kjo nismë bëhet për të ruajtur boshtin e ekipit kampion, por edhe për të mos i humbur lojtarët në fjalë me parametra zero. Alen Sherri dhe Abdurrahman Fangaj prej kohesh janë në diskutime me klubin për të vendosur mbi të ardhmen e tyre.
Shkodranët kanë shprehur dëshirën për të qëndruar, por rinovimi i tyre do të pasohet me një rritje të konsiderueshme të pagës. Palët janë në bisedime dhe para 30 qershorit pritet të qartësohet gjithçka mbi të ardhmen.
