Shkëndija e Tetovës ka qenë ekipi dominues i kampionatit maqedonas në këto sezone teksa në tre vitet e fundit janë kurorëzuar kampionë duke lënë pas rivalët e Vardarit.
Madje, tetovarët falë edhe investimeve në skuadër kanë bërë paraqitje mbresëlënëse në Europë duke kaluar disa ture kualifikues, ndërsa janë ndeshur me ekipe prestigjioze si Milan, Tottenham apo edhe Gent i Belgjikës.
Megjithatë, arritjet në fushë nuk shkojnë në të njëjtën rrymë me mirëmbajtjen e stadiumit, teksa nga një video së fundmi pamjet lënë shumë për të dëshiruar. Impianti i Shkëndijes është i rrethuar nga plehrat dhe në gjendje të mjeruar, ku fare qartë duket se është lënë pas dore.
Një fakt për të ardhur keq, pasi Shkëndija e Tetovës përfaqëson një klub simbolik për të gjithë shqiptarët dhe imazhi në këtë rast është shumë i rëndësishëm.
