Pak javë më parë, Shënkolli U19 mundi Vllazninë, por dje ka ndodhur ndryshe. “Hakun” e Vllaznisë e ka marrë një ekip tjetër i qytetit verior, Shkodra U19, teksa në ndeshjen e rradhës për kampionat, në mes saj dhe ekipit të Shënkollit, ka fituar ekipi i Shkodrës.
Kështu ka ndodhur në takimin e luajtur në fushën sportive “Zmijani” të Shkodrës. Skuadra e drejtuar nga trajneri Taip Piraniqi, ka fituar me rezultatin 2-1 dhe me këtë trepikësh, është barazuar me Shënkollit në renditje, duke e parakaluar atë në tabelën e klasifikimit, me të dy ekipet që kanë nga 13 pikë.
Duhet thënë se ka qenë një takim me shumë rivalitet dhe të tre golat janë shënuar në pjesën e dytë. Fillimisht, ka qenë Shkodra U19, që ka arritur të kalojë në avantazh me anë të futbollistit Shpuza, në minutën e 64-të. Megjithatë, pas golit ai ndëshkohet me karton të kuq, duke lënë ekipin e tij me 10 lojtarë.
Pas këtij kartoni, ekipi i Shënkollit do të arrijë të barazojë me anë të futbollistit Marku, në minutën e 70-të.
Ndërkohë, më pas u duk se me këtë rezultat do të mbyllej kjo ndeshje, por nuk kanë qenë të këtij mendimi vendasit. Në minutat e fundit të ndeshjes, Shkodra U19 do të shënonte golin e dytë dhe të avantazhit, me autor Xhakajn.
Përfundimisht, 2-1 për Shkodra U19, që me këtë trepikësh, është ngjitur në kuotën e 13 pikëve dhe ndodhet e shtata në renditje, ndërkohë që Shënkolli U19, pas kësaj humbjeje, ka zbritur në vendin e tetë edhe ajo me 13 pikë, por me një golavarazh më të dobët se Shkodra U19, me të cilën kanë ndërruar pozicionet në renditje.
Maringlen ZHIVANI
