Brahim Diaz vazhdon të jetë i tronditur emocionalisht pas humbjes së dhimbshme në finalen e Kupës së Afrikës, një zhgënjim që i mohoi Marokut trofeun e shumëpritur prej 50 vitesh. Sulmuesi i Real Madridit përjetoi një turne të jashtëzakonshëm në aspektin personal, por që u mbyll mes lotësh dhe dëshpërimi.
Pesë gola në shtatë ndeshje, një penallti e humbur dhe një episod vendimtar me topin që i shpëtoi në momentin më kritik shënjuan aventurën e Diazit në këtë kompeticion.
Edhe pse u shpall golashënuesi më i mirë i turneut, 24-vjeçari nuk arriti ta përmbante emocionin pas finales së humbur, duke shpërthyer në lot përpara shokëve të skuadrës dhe tifozëve.
Në një moment delikat për kombëtaren, në mbrojtje të lojtarëve dhe veçanërisht të Brahim Diazit doli Presidenti i Qeverisë Marokene, Aziz Ajanuch, me një mesazh të fortë mbështetjeje dhe krenarie.
“Ju keni fituar zemrat e të gjithë marokenëve. Kam një mesazh të veçantë sepse pashë që Brahim Diaz ishte shumë i prekur. Në fakt, ai ishte zbulimi i këtij turneu dhe golashënuesi më i mirë”, u shpreh Ajanuch.
Presidenti theksoi gjithashtu rëndësinë e vendimit të Diazit për të përfaqësuar Marokun në arenën ndërkombëtare.
“Ai zgjodhi vetë të bashkohej me ekipin kombëtar dhe të vishte fanellën e Marokut. Ju nuk fituat vetëm ekipin kombëtar, ju fituat zemrat e të gjithë marokenëve. Futbolli ka fitore dhe humbje, por këtë herë fati nuk ishte në anën tonë”, deklaroi ai.
Edhe pse pa trofe, Brahim Diaz largohet nga Kupa e Afrikës si një simbol shprese dhe krenarie për Marokun, duke dëshmuar se ndikimi i tij shkon përtej një finaleje të humbur.
