Në fund të sezonit, trajneri gjerman Jurgen Klopp do të largohet nga Liverpool dhe, kush e di, të njëjtën gjë mund të bëjë edhe sulmuesi egjiptian Mohamed Salah. Në merkaton e janarit u përfol shumë për një transferim të Salah në Arabi.
Emri i egjipitianit u lidh ngushtë me skuadrën arabe të Al Ittihad. Ndaj, nuk mund të përjashtohet një e ardhme e mundshme e 31-vjeçarit në Arabinë Saudite. Gjithsesi, për momentin lojtari ka mohuar gjithçka për largimin e tij nga “Anfield”.
Duke folur për “Sky Sports”, lojtari komentoi lamtumirën e Klopp. Ai nënvijëzoi se kjo lamtumirë e trajnerit nuk ka asnjë lidhje me një largim të tij të mundshëm këtë verë. “Jo! Largimi i trajnerit nuk do të ndikojë në zgjedhjen time”, tha Salah.
“Një ditë edhe unë do të largohem nga Liverpool, por ajo ditë nuk ka ardhur ende. Trajneri është shumë i rëndësishëm për një klub, por e ardhmja e tij nuk ndikon në timen. Jam i lirë për të marrë vendimet e mia”, u shpreh Mohamed Salah.
Egjiptiani luan prej vitit 2017 me Liverpool, ku ka fituar gjithçka në karrierën e tij. në 335 ndeshje zyrtare me “reds”, Salah ka realizuar 205 gola, duke qenë një idhull i tifozerisë vendase./telesport/
