Agim Ibraimi është një nga emrat më të spikatur të Kategorisë Superiore në edicionin e fundit. Sulmuesi me eksperienca të rëndësishme në Europë, mes të cilave edhe një vit te Kaljari në Serinë A, iu bashkua Kukësit, ku mori edhe shiritin e kapitenit në këtë sezon.
Por marrëveshja me klubin është mbyllur për momentin dhe para se të zgjatet akordi për një vit tjetër siç është planifikuar, Ibraimi po shqyrton ofertat e shumta që ka marrë. Të gjithë klubet kryesore në Superiore kanë kërkuar lojtarin nga Maqedonia e Veriut, por jo vetëm.
“Infosport.mk” raporton se një ofertë e fundit dhe e rëndëishme për Ibraimin është ajo nga klubi i Ballkanit në Kosovë që është gati ta bëjë pjesë të projektit të ri.
Pak ditë më parë ky klub prezantoi Nderim Nexhipin si drejtor sportiv e ishte pikërisht ky i fundit që afroi Ibraimin te Kukësi. Tashmë ai kërkon që ta bëjë pjesë të klubit të tij të ri, pasi njeh cilësitë e futbollistit, që do të ishte një ndihmesë e madhe për arritjen e objektivave në sezonin e ri ku Ballkani synon pjesëmarrjen në Europë e trofe.. /vipsport/
