Që prej ditës së djeshme kombëtaret U19 dhe U20 janë grumbulluar në Durrës dhe pasditen e sotme kanë zhvilluar një ndeshje miqësore përballë njëra- tjetrës. Ndeshje kjo që është fituar nga kombëtarja U20 ne rezultatin 3-2.
Në formacionin e saj nga minuta e parë e kanë nisur ndeshjen si titullar plot 4 futbollistë të Vllaznisë. Bëhet fjalë për portierin Kristi Qarri, mbrojtësit Enes Isufi e Elmir Lekaj si dhe sulmuesin Mehdi Çoba. Madje, një shkodran ka mbajtur edhe shiritin e kapiteni, Isufi.
Po ky lojtar ka qenë protagonist edhe me golin e shënuar në pjesën e parë. Në fakt, ndeshja ka nisur më mirë për kombëtaren U19 që ka shënuar dy gola njëri pas tjetrit.
Më pas, pas një goditje këndi, Isufi ka kërcyer saktë me kokë duke e dërguar topin në rrjetë dhe ka ngushtuar shifrat.
Në pjesën e dytë ndërkohë 20 vjeçarët kanë shënuar edhe dy gola të tjerë duke e fituar kësisoj krejt ndeshjen me rezultatin 3-2.
Në këtë pjesë është aktivizuar edhe mesfushori Eraldo Deda me këtë ekip, ndërkohë që me atë të 19 vjeçarëve është aktivizuar mesfushori tjetër i Vllaznisë Klevis Bebeziqi./SHKODRA-SPORT.COM/
