Ka më shumë se një muaj që Kevin Zefi, futbollisti shkodran i lindur dhe i rritur në Irlandë është pjesë e seancave stërvitore të Vllaznisë.
Futbollisti 20-vjeçar prej disa kohësh është nën urdhrat e trajnerit Martini, e po ashtu duke zhvilluar stërvitjet normalisht me pjesën tjetër të grupit kuqeblu. Pavarësisht se për zyrtarizimin e tij në radhët e 9 herë kampionëve të vendit ende s’ka asgjë konkrete, kjo si pasojë e dokumentacionit që ende mungon nga ana e dy skuadrave italiane. Me drejtuesit dhe stafin e Vllaznisë që po punon në mënyrë që të gjendet një zgjidhje sa më e shpejtë për ish-lojtarin edhe të kombëtares U-21 të Irlandës.
Momentalisht si pengesë duket se është çmimi që duhet të paguajnë 9 herë kampionët e vendit për vitet e formimit të Zefit në dy ndër akademitë më prestigjioze të futbollit në Itali, siç janë ajo e Romes dhe Interit. Megjithatë shpresat janë të mëdha në kampin kuqeblu që një marrëveshje që do kënaqë të gjitha palët do arrihet shumë shpejt.
Vetë sulmuesi, i cili mund të aktivizohet edhe si mesfushor i avancuar është shprehur i gatshëm për të luajtur në Superiore me Vllazninë. Dhe duket se dëshira e tij shkon paralelisht edhe me pretendimet e stafit teknik rreth cilësive të Zefit. Ku te Vllaznia duken shumë të kënaqur me atë çfarë ka treguar Zefi gjatë kësaj periudhe në proceset stërvitore.
E ai shikohet si një futbollist shumë i vlefshëm për vijueshmërinë e edicionit të shkodranëve, të cilët me siguri do mbyllin gjithçka me zyrtarizimin e këtij afrimi para përfundimit të vitit kalendarik 2025.
