Bajern Mynih është mposhtur për të dytën javë në Bundesligë teksa është mposhtur nga Borusia Mynçengladbah në transfertë me rezultatin 2-1. Bavarezët morën një goditje të rëndë duke qenë se edhe në javën e kaluar pësuan një disfatë nga Bajer Leverkusen.
Sa i përket kësaj ndeshje, pjesa e parë nuk kishte shumë për të theksuar, veç një dëmtimi të Toliso i cili la fushën e lojës në minutën e 20 dhe u zëvendësua nga Perisiç.
Emocionet ishin ruajtur për në fraksionin e dytë të lojës, aty ku ishin bavarezët ata që kaluan të parët në avantazh me anë të Perisiç. Ndërsa, në minutën e 60 Borusia Mynçegladbah gjeti golin e barazimit me Bensebaini.
Ndërkohë, drama erdhi në minutat e fundit. Teksa ndeshja po shkonte drejt barazimit, një ndërhyrje e Havi Martinez ndryshoi ekuilibrat.
Spanjolli shkaktoi penallti dhe u ndëshkua me karton të kuq, ndërsa Bensebaini sërish shënoi dhe u tregua i saktë nga pika e bardhë. Në këtë formë, Gladbah ruan kryesimin ndërsa Bajerni mbetet shtatë pikë larg vendit të parë në vendin e gjashtë.
Sa i përket ndeshjeve të tjera, Dortmundi mori një fitore të madhe me shifrat 5-0 ndaj dyseldorfit, ndërsa sukses pati edhe Frajburgu i mesfushorit shqiptar, Amir Abrashi por që nuk u aktivizua për asnjë minutë.
Rezultatet:
Augsburg- Mainz 2-1
B. Gladbah- Bajern Mynih 2-1
Dortmund- Dyseldorf 5-0
Frajburg- Volfsburg 1-0
Lajpcig- Hofenhajm 3-1
