Pritet vetëm zyrtarizimi por Ronald Kuman shumë shpejt nuk do të jetë më trajneri i Barcelonës. Paraqitjet shumë të dobëta të ekipit kanë kaluar në plan të dytë edhe krizën financiare dhe Joan Laporta, ndonëse di koston e rëndë që mbart shkarkimi i trajnerit holandez, është i ndërgjegjshëm se çdo shans i katalanasve për të kaluar këtë moment të errët lidhen në mënyrë direkte me sukseset në fushën e lojës.
Me Kuman duket se nuk do të ketë të tillë ndaj në mediat spanjolle bëhet e qartë se orët e tij janë të numëruara. Përveç kësaj, ka nisur puna efektive për të gjetur një zëvendësues që mund të kthejë entuziazmin në ekip e në tifozerinë e Barcelonës dhe duket se në garë kanë mbetur vetëm dy kandidatë.
Në Itali bëjnë të qartë se në ditët e kaluara ka patur kontakte direkte e indirekte me Andrea Pirlon, pasi Joan Laporta shpreson që ai të ndjekë gjurmët e Pep Guardiolës duke u afirmuar si një trajner i madh megjithëse eksperienca e tij e parë me Juventusin nuk shkoi aq mirë sa pritej.
Gjithsesi, duket se në ditët e fundit është kthyer në garë Çavi Hernandez, i cili është gati të largohet nga Al Sad dhe po negocion me klubin atje lamtumirën në mënyrën e duhur. Laporta i ka bërë të qartë Çavit se kërkon që ai të marrë drejtimin tani dhe jo të pritet fundi i sezonit, siç mendonte ish-mesfushori katalanas.
Negociatat vazhdojnë, por tashmë është e kuptueshme se njëri mes Pirlos dhe Çavit do të ulet në pankinë e Barcelonës pas shkarkimit të Kuman.
