Dita e djeshme ka qenë e fundit për dorëzimin e listave të partive politike dhe koalicioneve të tyre për këshilltarët bashkiakë në zgjedhjet 14 majit. Kuptohet që vëmendja ka qenë e madhe për personat që do të përzgjidheshin për të qenë pjesë e këtyre listave.
Natyrisht që edhe komuniteti i sportit ka qenë i interesuar për të mësuar nëse do të kishte pjestarë të tij në këto lista. Sepse kemi të bëjmë me këshilltarët e ardhshëm të Bashkisë Shkodër, të cilët me vendimet e tyre të mëtejshme në katër vitet e ardhshme do të kenë mundësi të vendosin ndër të tjera edhe për sportin, për buxhetin e tij dhe investimet që mund të bëhen.
Por nëse i hedhim një sy listës së koalicionit “Bashke Fitojmë”, konstaton që PD “e ka harruar” sportin dhe nuk i ka kushtuar aspak rëndësi. Ndër 52 emrat e kësaj liste, konstatojmë që janë vetëm dy emra që kanë lidhje me sportin. Bëhet fjalë për ish- atletin e Vllaznisë Ardit Rrashi i cili është i 37-ti në këtë listë si dhe për arbitrin e futbollit Ardit Çobaj që është i 45-ti.
Nëse i referohemi listës së dorëzuar nga Partia Socialiste, konstatojmë që ata të cilët e kanë hartuar atë, i kanë kushtuar shumë rëndësi sportit teksa pjesë e kësaj liste janë disa njerëz të tij, plot 6 nga 52 vetë që ka lista e dorëzuar. Duke filluar nga numri 1 i kësaj liste, një emër shumë i njohur, ish- kampioni dhe ish- rekordmeni i atletikës Oltion Luli.
Në listë, numri 7 i takon një tjetër njeriu që është pranë sportit, mësuesit të edukimit fizik Fatbardh Dama. Numri 9 në listë i përket Rudin Bekës, ish- futbollistit të Vllaznisë, tashmë pedagog i Universitetit “Luigj Gurakuqi” të Shkodrës. Ndërkohë numri 13 i takon volejbollistit aktual të Vllaznisë Ardit Taflaj, numri 19 është një tjetër mësues i edukimit fizik Erald Erkoçaj. Më poshtë, numri 23 është për një tjetër volejbollist të Vllaznisë Nikolin Qafarenën.
Mjafton të shohim këto lista dhe konstatojmë që zëri i sportit në Këshillin e ardhshëm bashkiak të Shkodrës do të jetë shumë pak i përfaqësuar. Nga koalicioni “Bashkë Fitojmë” me shumë siguri nuk do të kemi asnjë këshilltarë, ndërsa nga ai i Partisë Socialiste do të jenë por në numër të reduktuar. Nisur edhe thjesht nga kjo, duket se ditë edhe më të vështira për sportin shkodran po vijnë…
