Federata Shqiptare e Futbollit njoftoi së fundmi se ka komunikuar me klubin e Bylisit për të qenë në dijeni të zhvillimeve brenda klubit mallakastriot pas kryerjes së testeve anti-koronavirus.
Në faqen e saj zyrtare, FSHF-ja bën me dije se lojtari i infektuar i Bylisit Eridon Qardaku është vendosur në karantinë dhe ndodhet në gjendje të mirë shëndetësore, ndërsa e gjithë pjesa tjetër e skuadrës gëzon shëndet të plotë.
Njoftimi i FSHF-së:
Federata Shqiptare e Futbollit bën me dije se është njohur me rastin e një futbollisti të KF Bylis, i cili pas testeve mjekësore rezultoi pozitiv me COVID 19.
Menjëherë, Federata ka marrë kontakt me drejtuesit e klubit mallakastriot dhe është informuar për situatën e krijuar.
FSHF njofton se janë ndjekur të gjitha protokollet shëndetësore dhe se të gjithë futbollistët dhe stafi i KF Bylis i janë nënshtruar testeve mjekësore për të verifikuar nëse ka pasur përhapje të infeksionit.
Aktualisht, futbollisti i infektuar me COVID 19 është karantinuar sipas rregullave dhe është në gjendje të mirë shëndetësore.
Gjithashtu, pas testeve ka rezultuar se asnjë pjesëtar tjetër i KF Bylis nuk është prekur nga virusi dhe të gjithë gëzojnë shëndet të plotë.
Sektori i Marëdhënieve me Publikun, FSHF
