Pas shkarkimit të Ruben Amorim-it në fillim të javës, Manchester United po përgatitet për një fazë të re dhe po shqyrton emërimin e një trajneri të përkohshëm, ndërsa vendimi për një trajner të përhershëm pritet të merret në sezonin 2026/27.
Mes kandidatëve më të favorizuar janë Ole Gunnar Solskjaer dhe Michael Carrick, me norvegjezin që duket të jetë në krye të listës. Solskjaer, ish-sulmues i “Red Devils” dhe trajner i skuadrës kryesore nga dhjetori 2018 deri në nëntor 2021, tashmë ka zhvilluar një bisedë të parë në qendrën stërvitore të klubit.
Sipas mediave norvegjeze, United i ka propozuar një kontratë me pagë të ulët krahasuar me standardet e Premier League: rreth 63,000 euro në javë (pak më shumë se 250,000 euro në muaj), dukshëm më pak se paga e Amorim, e cila ishte rreth 155,000 euro në javë (7,5 milionë euro në vit).
Pjesa më e madhe e kontratës lidhet me bonuset e performancës. Në veçanti, Solskjaer mund të përfitojë një bonus prej 4,5 milionë eurosh nëse arrin ta kthejë Manchester United në Champions League sezonin e ardhshëm.
Ky rikthim i Solskjaer përfaqëson një sfidë të madhe dhe një mision të qartë: të rikthejë Manchester United ndër skuadrat kryesore të Europës.
