Për herë të parë një Kupë Bote do të organizohet në Lindjen e Mesme. Katari do të hapë dyert për Botërorin 2022 më datë 20 nëntor, por edhe pse vetëm 7 ditë larg kontestimet nuk mungojnë.
FIFA dhe vetë Katari janë kritikuar ashpër për organizimin e këtij eventi madhor, që do të zhvillohet në kushte si kurrë më parë.
Lidhur me kundërshtinë e opinionit publik ka folur Sekretari i Përgjithshëm i delegacionit të Katarit, i cili është shprehur se ka rënë në depression nga sulmet verbale të njerëzve që nuk e kanë pritur mirë faktin se shteti i tij do të mikpresë këtë Kupë Bote.
“Kur fituam, ndjeva gëzim. Megjithatë, unë rashë shumë shpejt në depresion. Ishte një sulm dashakeq ndaj nesh, ndaj FIFA-s. Ata u sulmuan nga të gjitha anët, edhe vendi ynë. I ngjanin sulmeve raciste. Ishte e vështirë”, ka thënë Hassan Al Thawadi.
