‘Ndaj Çekisë do të jetë vendimtare’, Tare: Jam kurioz për kthimin e Brojës

Igli Tare mendon se ndeshja ndaj Çekisë do të jetë vendimtare për fatin e Kombëtares shqiptare në rrugëtimin e saj drejt Euro 2024. Ai pranon se kuqezinjtë janë në rrugën e duhur. Por në intervistën e tij për “Sport Neës” në “Neës 24”, ka shpjeguar se ekipi nuk duhet të kalojë në eufori për këtë momente,

Në analizën e tij, ish-sulmuesi i kombëtares është ndalur edhe te emrat e veçantë të skuadrës, te ajo që po bën mirë Silvinjo dhe ashtu si shumëkush, ka pranuar se është kurioz të shohë Brojën nën urdhrat e brazilianit.

Në Shqipëri janë të “dehur” pas Kombëtares në këto momente. Ku i ndoqe dy sfidat e fundit? Të pyes ku e ndoqe, se më bëri përshtypje Mirel Josa, pasi theksoi se nuk arriti të siguronte një biletë. E pashe në shtëpi më tha, po ju e kishit një ftesë?
Jo, unë ftesë nuk kisha, por kisha dhe një justifikim, kisha një problem familjar, duhej të largohesha nga Shqipëria. Isha në Romë, ndeshjen e pashë në shtëpinë time, me djalin.

Çfarë shije të la sfida me Poloninë, e prisje një sukses të pastër 2-0?
Nuk e prisja një fitore, sinqerisht, por isha i bindur që do të merrnin një rezultat pozitiv, sepse është krijuar një lloj klime rreth skuadrës, një energji pozitive që ndikon edhe në paraqitjen e skuadrës në fushë, kështu që isha shumë i bindur që nuk do të dilnim të humbur nga ndeshja. Por golat dhe fitorja ishte më të vërtetë ekzaltuese. Nuk ka se si të shkojë më mirë për skuadrën tonë, por duhet të jemi të qetë dhe me këmbë në tokë sepse ndeshja me Çekinë do të jetë vendimtare, kështu që, kjo euforia nuk duhet të jetë një armë negative, por duhet të jetë një armë pozitive.

Igli, çfarë ka ndryshuar Silvinjo në kaq pak kohë? Përveç skemës, si të duket ekipi që ka ndërtuar?
Thuhet gjithmonë që fitorja ka shumë baballarë dhe humbja ka vetëm një nënë. Në këtë moment duhet të përqendrohemi te fakti që Silvinjo ka ardhur me një entuziazëm, e tregon me ide të qarta loje. Është shumë shpejt për të thënë që kanë ndryshuar shumë gjëra se mos gabohem është ndeshja e 5-të e tij me kombëtaren. Është akoma shumë shpejt për të folur për ndryshime shumë të mëdha. Por forma e lojtarëve, shumë aktivizohen në skuadrat ku luajnë dhe është shumë domethënëse, grupi që është krijuar ka shumë lojtarë që mund të jenë të gatshëm të luajnë në formacion dhe kjo e ndihmon shumë trajnerin që të ketë shumë zgjedhje. Kryesorja është fakti që ai të jetë i motivuar për ndeshjet e fundit që kanë mbetur se do të ishte një rezultat domethënës.

Igli, fakt është që Silvinjo i ka dhënë shumë peshë dy lojtarëve që ti i njeh shumë mirë, Asllani dhe Nedim Bajrami. Dy lojtarë që sipas mediave italiane i keni kërkuar dhe gjatë kohës kur ishte te Lacio. Si t’u duket paraqitja e tyre këtë periudhë?
Kam qenë gjithmonë i mendimit edhe në kohën e Rejas, edhe në bisedat personale, një lloj kritike ndaj tij ka qenë që Shqipëria nuk e ka luksin që lojtarë si Asllani të jenë në stol, duke ditur skuadrën ku luan. E njëjta gjë me Kumbullën kur të kthehet dhe Broja, se është një shtyllë kurrizore e skuadrës dhe rreth tyre duhet ndërtuar gjithçka për një 10-vjeçar për të ardhmen. Bajrami dhe Asllani nuk janë një surprizë, janë thjesht lojtarë që u është dhënë mundësia, besimi dhe e kanë justifikuar në fushën e lojës me rendimentin që kanë treguar.

A munden këto dy lojtarë t’i shohim në nivele më të larta në Serie A? Bajramin më shumë, se Asllani është në maksimum, luan tek Interi, pavarësisht se nuk shihet titullar nga Inzagi…
Bajrami është një lojtar që ka karakteristika shumë të mira, por ka pasur oshilacione në formën e tij. Të gjithë flasin me elozhe shumë të mëdha, por nuk ka pasur mundësi të ketë vazhdimësi si lojtar bazë i një skuadre. Ia uroj me gjithë zemër, sepse është një lojtar i jashtëzakonshëm për mënyrën se si e interpreton lojën dhe do të isha shumë i lumtur nëse ai do të gjente vazhdimësi në skuadrën e tij si një lojtar kryesor. Për Asllanin, ka një detyrë shumë të vështirë tek Interi. Eksperienca që po fiton aty është shumë e rëndësishme, por se edhe për të do të ishte e rëndësishme të shkonte diku, të gjente një skuadër ku të ketë vazhdimësi, sepse është akoma në një fazë pjekje dhe akoma nuk e ka dhënë maksimumin e tij.

Në Itali këto ditë, tifozët me batutë në rrjet shkruajnë se në Evropian, të paktën kanë se me kë të bëjnë tifo, për Shqipërinë, duke iu referuar krizës së Italisë pas barazimit me Maqedoninë e Veriut. Mund të ndodhë ky skenar, Italia jashtë dhe Shqipëria në “Euro2024”? Duket sikur pas turistëve po i marrim dhe futbollin Italisë…
Është për të ardhur keq në fakt, nuk është për të bëra shaka. Futbolli evropian, ose një Evropian pa Italinë do të ishte një goditje shumë e madhe, duke parë që italianët në dy Botëroret e fundit nuk kanë pasur mundësi të kualifikohet, është një goditje e madhe për futbollin italian. Është një goditje e madhe për futbollin italian, është një krizë që duhet të kalojë me shpejtësi të madhe pasi Italia është një lokomotivë për futbollin evropian dhe botërorë. Shpresoj që ta sigurojnë sa më shpejt kualifikimin, duke filluar që nga sot në darkë, në ndeshjen me Ukrainën.

Një tjetër lojtar që ju e njihni shumë mirë është dhe Elseid Hysaj, që për fat të keq është sulmuar jo pak periudhat e fundit, ndërsa Silvinjo zgjodhi një tjetër kapiten. Por ndaj Polonisë ishte lojtari me notën më të lartë, zhvilloi një ndeshje perfekte. Si e keni parë Hysaj me fanellën kuqezi këtë periudhë?
Hysaj është nga ato lojtar që është lënë nën hije, sepse eksperienca e tij, lidershipi që ai ka brenda skuadrës janë të padiskutueshme. Ai e di shumë mirë sa duhet të japi, kur duhet ta japi. Eksperienca që ai ka e ndihmon shumë, është diçka që ekipi Kombëtar ka shumë nevojë shumë për të, është një nga lojtarët veteran të skuadrës. Edhe vet ai e di që ka një rol të veçantë dhe që atë rol duhet ta interpretojë në mënyrën më të mundshme.

Igli, çfarë ka ndryshuar, tani Shqipëria bën një futboll pak më ofensiv, ose më saktë realizon super gola, kemi sulmin më të mirë në Grupin E, 8 gola në 5 ndeshje. Duhej të vinte një brazilian që të shënonim kështu golash të çmendur?
Mbase ka të bëjë edhe më këtë, pak samba, gola alla Roberto Carlos, golat e Asanit, goli i Bajramit. Unë besoj që kualiteti i skuadrës është shumë i madh, është akoma në një fazë rritje, është akoma një skuadër shumë e re, është akoma një skuadër që ka nevojë të konsolidohet. Ka nevojë për një ambient që eksperiencën e “Euro2016” duhet ta nxjerr si mësim dhe të dijë si të sillet rreth kësaj skuadre, sepse siç i thonë në Itali: Nga yjet në stallë, është shumë shpejt, pra duhet të jemi të gjithë të fokusuar, të gëzuar për çfarë na dhanë djemtë. Edhe në përditshmërinë tonë të jep një ndjenjë shumë të mirë kur i mendon këto fitore, atë gëzim të madh që i kanë dhënë shqiptarëve kudo në botë. Duhet të jemi të gjithë bashkë, këtë lloj euforie duhet t’ia transmetojnë lojtarëve në anën e duhur, në mënyrën e duhur, sepse ndeshja me Çekinë bëhet vendimtare dhe presioni duhet të jetë pozitiv, jo negativ.

Meqë jemi te sulmi, prurja e re Mirlind Daku, duket si një Igli Tare në kohet moderne, në kohen e sotme. Çfarë mendimi keni për këtë lojtarë, të ngjason ndopak, çfarë mund t’i japë Kombëtares?
Unë nuk i kam qejf këtë krahasimet, Igli Tare, Bogdani. Ne jemi sulmues që kemi qenë në një epokë tjetër…Daku-Broja kanë mundësi të bëjnë një karrierë shumë më të mëdha se sa ne. Broja është në rrugën e duhur, ja uroj edhe Dakut pasi është një lojtar shumë punëtor, ka karakteristika shumë të mira që i duhen shumë skuadrës, pasi di të mbrojë shumë mirë topin, di të sulmojë thellësinë, do të jem shumë kurioz edhe kur të kthehet Broja. Jam shumë kurioz se si do ta zgjidhë trajneri i Kombëtares këtë problem pasi mos harrojmë është edhe Cikalleshi, që është një lojtar me shumë eksperiencë, Uzuni. Muçi një lojtar që unë e çmoj jashtëzakonisht shumë dhe ka pasur shumë pak mundësi të tregojë vlerat e tij. Muçi është një lojtar që Kombëtarja duhet të ketë një vëmendje të veçantë pasi në të ardhmen do të bëjë diferencën. Bajrami, Muja, edhe ky lojtar shumë i mirë. Në repartin ofensiv, Silvinjo ka shumë opsione, por ai duhet të zgjedhë lojtarët më të mirë dhe mbi të gjitha lojtarët që i përshtaten skemës së tij.

Jo vetëm Daku, por Silvinjo do e ketë problem shumë të madh të përzgjedhë lojtarët në fazën sulmuese nëse shkojmë në Evropian. Janë edhe Seferi, Cikalleshi, Muja, Uzuni, Muçi etj, por mungon Broja… A mund të ndryshohen balancat, apo dhe skema me rikthimin e Brojës?
Trajneri duhet të mendojë mirë zgjedhjet e tij. Janë disa reparte që kanë nevojë për alternativa siç është krahu apo mesfusha. Kjo është një skuadër që ka shumë alternativa. Zgjedhjet e trajnerit besoj se janë të duhurat. Shpresoj shumë që të shkojmë në Europian.

Igli një koment të shkurtër, të gjithë prisnim që heronjtë të ishin talentet që luajnë në Serie A, por ylli i ri në këto momente është Jasir Asani, një lojtar që nuk e pa askush gjatë kohës që ishte në Shqipëri, por e gjeti Silvinjo në Korenë e Jugut. Si të duket mëngjarashi ynë?
Asani është djalë i thjeshtë. Duket nga ata lojtarët që e ka besimin dhe nuk dorëzohet asnjëherë. Ai e meriton të jetë pjesë e kësaj skuadre. Do kisha një këshillë për FSHF që ka ardhur momenti të krijohet një klub i legjendave. Duket ditur që ka shumë futbollistë që kanë kontribuar për kombëtaren shqiptare, marr shkas nga intervista e Mirel Josës. Besoj se ka të bëjë me trajtimin, ata e kanë merituar. Secili e meriton për atë që ka dhënë për kombëtaren shqiptare.

Nga ky grup lojtarësh, kush ai lojtar që pret më shumë, kush mund te ngrihet në një tjetër nivel?
Nuk pres, jam shumë kurioz të shikoj Brojën sesi do përshtatet. Besoj se do e ketë të vështirë të përshtatet me skuadrën e re.

Çfarë pret nga ekipi Kombëtar, ku mund të arrijmë me këtë grup, deri ku mund të shkojmë, apo ka ende dyshime për në “Euro2024”?
Nuk më pëlqen të flas përpara kohe, gjërat duhet të komentohen atëherë kur ndodhin. Premisat janë të mira. Të shkosh në Europian është diçka e madhe. Çdo gjë duhet folur në momentin dhe kohën e duhur.

Igli, në Itali, në çdo portal, emri juaj bën lajm, nuk dua të ngacmoj në lidhje me ofertat e shumta që keni pasur ketë periudhë, post Lazio. Por çfarë pret drejtori sportiv shqiptar më i famshëm në botë, çfarë projekti po prisni për t’ju parë sërish në aksion?
E kam bërë me vetëdije të largohesha nga futbolli. I jam dedikuar familjes dhe vetes time. Në muajt e ardhshëm do kem mundësinë t’i dedikohem ndonjë projekti të ri. Thjesht po shijoj kohën me familjen dhe shoqërinë. Dua të njoh disa klube nga afër, për mënyrën sesi punojnë nga brenda.

E fundit, të gjithë të prisnim që të ndihmoje Partizanin, por ndihmove Dinamon. Përtej shakasë, si të duket niveli i futbollit shqiptar, vendas, pse nuk shkojmë dot paralelisht me Kombëtaren?
Meqë ra rasti, u komentua shumë rikthimi i Tares në Shqipëri. Doja që nga eksperienca ime të jepja disa këshilla dhe mbi të gjitha duke parë që trajneri i Dinamos është miku im i vjetër. Thjeshtë kam dhënë disa këshilla për klubin dhe skuadrën. Partizani do mbetet gjithmonë në zemrën time.