Bruno Dita ka zgjidhur dilemat rreth të ardhmes së tij. Mesfushori i cili ka qenë një nga më të spikaturit në radhët e Shkëndijës në sezonet e fundit, ka vendosur që të zgjatë bashkëpunimin me kuqezinjtë e Tetovës.
Klubi bëri të ditur se kishte rinovuar për dy vite me mesfushorin i cili mbetet kështu një pjesë e rëndësishme e projektit të kësaj skuadre që synon të kthehet shpejt të titulli kampion. Një rinovim që vjen pavarësisht ofertave që futbollisti ka marrë nga Superiorja ku ishin të shumtë klubet e interesuar për të.
NJOFTIMI I SHKËNDIJËS SË TETOVËS
KF Shkëndija me kënaqësi njofton për vazhdimin e bashkëpunimit me mesfushorin Bruno Dita. Kështu Dita edhe në periudhën në vazhdim do të jetë pjesë e skuadrës kuqezi, duke nënshkruar kontratë të re dy vjeçare dhe duke u lidhur me klubin tonë deri në verën e vitit 2024.
“Jam shumë i lumtur që sot nënshkrova kontratë të re me Shkëndijën dhe që do të vazhdoj edhe për dy vite tjera të mbaj fanellën kuqezi. Falënderoj drejtuesit e klubit që mundësuan vazhdimin e kontratës, por ka qenë edhe dëshirë e imja që të vazhdoj të jem pjesë e Shkëndijës. Posaçërisht më vjen mirë që do të vazhdoj qëndrimin në qytetin e Tetovës sepse e ndjej që jam lidhur edhe shpirtërisht me Tetovën. Në Shkëndijë kemi formuar një grup të mirë dhe jam i bindur se në periudhën në vazhdim do të shënojmë sukseset e radhës me Shkëndijën, ndërsa unë premtoj se do të jap maksimumin për këtë fanellë” tha Bruno Dita pas nënshkrimit të kontratës së re me kuqezinjtë.
