Nëse pyet tifozët braziliane se cili është futbollisti më i mirë i të gjitha kohëve në përfaqësuesen e tyre, ata do të ndalen kryesisht te dy emra, Pele dhe Luis Nazario Da Lima Ronaldo, ata që i kanë bërë të ëndërrojnë duke tundur rrjetat kundërshtare me fanellën e verdhë mbi supe.
Por që nga java e ardhshme, në mes të këtij binomi mund të futet Nejmar, edhe pse popullariteti i tij vështirë t’i afrohet ndonjëherë dy ish-qendërsulmuesve.
Brazili luan këtë javë dy ndeshje në kualifikueset e Botërorit dhe Nejmar do të zbresë në fushë për të ndihmuar ekipn e tij të kualifikohet, por edhe për të përmirësuar rekorde personale.
Kështu, që në ndeshjen e radhës me Bolivinë ai mund të përmirësojë bilancin e tij me Brazilin, për të cilin ka shënuar 61 gola.
Një gol më shumë, në vendin e dytë në renditjen historike është pikërisht “Fenomeni”, i cili ka shënuar vetëm 1 gol më shumë se sa Nejmar ndaj është mëse i kalueshëm për lojtarin e PSG.
Pak më larg, por gjithsesi në distancë që mund të arrihet, mbetet Pele, i cili ka realizuara 77 gola me fanellën e “Seleçao”. /vipsport/
