Kristjan Asllani humbi penalltinë, që do kishte barazuar 2-2 ndeshjen e Torinos ndaj Leçes. Mesfushori i Kombëtares gaboi nga pika e bardhë në minutën e 91-të.
Për të ishte hera e parë që gabon, ndërsa me klube kishte gjuajtur saktë 10 penallti më parë. Protagonist në anën tjetër mbetet Medon Berisha, që me dy asistimet e tij për Leçen kontribuoi te fitorja në Seria A.
Asllani kërkoi falje për penalltinë e humbur dhe tregoi çfarë nuk shkoi në goditjen e penalltisë. Meritë i mbetet edhe portierit të Leçes, Falkone që kuptoi krahun.
“Duhet ta analizojmë. E nisëm keq dhe Leçe na vendosi në presion. Kjo nuk është gjë e mirë, ne jemi Torino dhe duhet të japim çdo gjë në fushë. E marr përgjegjësinë për penalltinë, dhe u kërkoj falje tifozëve dhe skuadrës. Do ishim futur sërish në ndeshje. Për këtë kam ardhur këtu për të folur, t’i kërkoj falje të gjithëve.
Nuk kemi ruajtur vazhdimësinë që kishim para pushimit për shkak të kombëtareve. Duhet ta kuptojmë këtë situatë. Nuk mund të vijmë ndaj Leçes dhe të luajmë 30 minutat e para si sot.
Problemi? Nuk e di. Ndoshta u frikësuam pak pasi pësuam golin, por nuk duhet të ndodhte. Kemi energji dhe kualitet.
Penalltia? Ishte gabimi im. Nëse portieri e ndal topin, do të thotë se penalltia është goditur keq. Pashë dy finte të Falkone dhe më iku truri”, u shpreh Asllani.
