Vllaznia do të luftojë në dy ndeshjet e mbetura që të sigurojë vendin e 4-të në tabelën e klasifikimit. Pozicion që të çon në Europë sezonin e ardhshëm, pasi Kupën e Shqipërisë mund ta fitorjë njëra mes Egantias dhe Tiranës që renditen në 3 vendet e para.
Shkodranët kanë pasur shumë oshilacione në këtë sezon, teksa ka bërë që të humbasin sidomos javët e fundit pikë të rëndësishme. Në një intervistë për mediat, presidenti Alban Xhaferi ka theksuar se dështimi si në Kupë ashtu dhe për titullin janë një dështim në Shkodër, por me të pëfunduar ky sezon atëherë do të bëhet një analizë e thellë.
Kupat e Europës janë objektivi i vetëm për të cilin nuk toelron aspa, ndërsa nënvizon se tashmë djemtë shkodranë kanë në këmbët e tyre arritjen në garat europiane.
“Në fund të sezonit duhet të ulemi dhe t’i bëjmë ato analizat tona. Sigurisht ikja nga kampionati dhe nga Kupa për ne ishte dështim. Duhet ta pranojmë të gjithë. Për këtë gjë dhe unë kam kostot e mia.
Sigurisht që duhet të luftojmë deri në fund për të arritur objektivin tonë, kupat e Europës. Unë jam optimist që tashmë është në këmbët e djemve për të arritur këtë objektiv dhe këto dy ndeshje t’i vlerësojmë maksimalisht që Shkodra të gëzohet dhe të kemi pjesëmarrje në kupat e Europës.
Është herët pa mbaruar sezoni. Unë mendoj se ky sezon duhet analizuar thellë. Për një sezon që kemi bërë gabimet tona. Ndryshimet, dëmtimet, janë një sërë faktorësh që në fund do t’i bëjmë analizën dhe duhet të dalim me konkluzionin tonë. me këtë gjë dua t’i kërkoj falje dhe tifozerisë shkodrane. Që në fillim Vllaznia ishte me objektivin për titullin kampion. Edhe Kupa sigurisht ishte pjesë e kësaj. Por të paktën të arrijmë atë objektivin minimal, kupat e Europës dhe të gëzohemi në fund.
Puna për sezonin e ri ka filluar për më shumë se një muaj. Ne jemi në fazën e studimit të ekipit të ardhshëm. Merkato është gjithmonë aktive dhe gjithmonë për të bërë një ekip kompetitiv. Kampionati ka qenë i gjatë, ka pasur ato problematikat e veta, por mendoj se ne do të mundohemi që të ruajmë një bazë të mirë të grupit aktual dhe më pas të plotësohemi me ato pozicionet që të jemi konkurrent.
Në radhë të parë dështimet ja faturoj vetes, sepse siç thash më përpara ne kemi pasur një objektiv që nuk e kemi arritur dhe për këtë gjë unë paguaj kostot e mia, si presidenti i Vllaznisë dhe aksioneri kryesor i klubit Vllaznia. pastaj analiza do të bëhet mbas kampionatit dhe aty gjithsecili do të marri meritat dhe dështimet.
Ne jemi Vllaznia dhe do të vazhdojmë të bëjmë lojën e bukur. Unë prandaj jam këtu, për të siguruar të gjithë tifozët që Vllaznia do të luajë siç ka luajtur këto tre vite, futbollin më të drejtë të mundshëm dhe sigurisht të prodhojmë futbollin sepse ajo na bashkon këtu. Pastaj këto aleancat mua më neveritin. Ne do të luajmë me këmbët tona.
Mbas kampionatit do të flasim dhe për stafin teknik. Me Laçin është ndeshje përcaktuese, sepse një fitore e Vllaznisë është një hap i sigurt për të arritur këtë objektiv. Tani të presim të enjten, ne kemi marrë të gjitha masat për të qenë sa më të përgatitur në këtë ndeshje.
Duhet të përmirësohemi. Ne vijmë duke mësuar prej gabimeve. Duhet pasur parasysh që në dy vite ne kemi fituar dy Kupa, që ka qenë një sukses i jashtëzakonshëm për mendimin tim. Duhet të përmirësohemi dhe gabimet na bëjnë që ne të përmirësohemi”, përfundoi Xhaferi.
