Joan Laporta bëhet gati të kthehet përsri në drejtimin e Barcelonës të cilën e kishte lënë si klubin më të mirë në botë, në ciklin e Guardiolës dhe Mesit. Ai shihet nga të gjithë si kandidati kryesor për të fituar zgjedhjet dhe njeriu që mund të kthejë lavdinë në klub e sidomos të mposhte Realin që vitet e fundit ka bërë më mirë.
“Kemi humbur mundësi të mëdha duke pasur në gjirin tonë lojtarin më të mirë të botës. Duhej të kishim fituar më shumë Liga Kampionesh, shpresojmë të kthejmë këtë histori suksesesh të Barcelonës në Ligën e Kampioneve. Gjatë mandatit tim të parë, Reali nuk fitoi asnjë” tha Laporta në një intervistë për “Marca”.
I pyetur për vazhdimësinë e Mesit, ai theksoi se në këtë aspekt kishte një avantazh në krahasim me kandidatët e tjerë në zgjedhje. “Intervistën e tij të fundit e shoh pozitive, pasi ka folur për fundin e sezonit dhe kjo na jep kohën për të bërë një propozim të besueshëm për të. Unë kam një avantazh me Leon, pasi ai më beson. Ai më ka thënë gjithmonë se është përmbushur gjithçka nga ato që i kam premtuar. Kur i jap fjalën, e bëj realitet”, tha Laporta i cili nuk kurseu një thumbim për rivalët historikë.
“A e kontrollon Reali VAR-in? SIgurisht! Nëse një marsian zbret në tokë dhe sheh VAR-in, do të thotë menjëherë që është i Madridit. Barcelona ka humbur shumë peshë në Federatë, Ligë, FIFA, UEFA dhe çdo organizatë që drejton futbollin. Barcelona duhet të rikuperojë besueshmërinë e saj”, deklaroi ish-presidenti që kërkon të kthehet në postin e tij drejtues. /vipsport/
