Qetësohen te Flamurtari. Klubi është drejt rikonfirmimit të grupit që ngjiti skuadrën në Kategorinë e Parë.
“Panorama Sport” mëson nga burime të sigurta pranë klubit se administratori Sinan Idrizi ka dhënë pëlqimin për qëndrimin e pjesës më të madhe të grupit të lojtarëve.
Orët e fundit ai ka konfirmuar se pjesa më e madhe e tyre do të mbeten pjesë e kuqezinjve për sezonin 2022-2023.
Nga sot pritet që të ketë zhvillime më konkrete. Drejtuesit do të ulen me titullarët për të negociuar dhe konkluduar marrëveshjet e reja. Në klub ka një listë të hartuar nga vetë Sinan Idrizi për lojtarët me të cilët kërkon vijimin e bashkëpunimit.
Është thuajse boshti i skuadrës që sipas planit qëndron. Ajo kryesohet nga portieri Shpëtim Moçka, për të vijuar me lezhjanin Ditmar Bicaj.
Pjesë e rëndësishme e projektit edhe kapiteni Andi Ribaj, duke shtuar këtu shkodranët Olsi Gocaj, Behar Ramadani dhe Denis Pjeshka.
Gjithashtu, qëndrimin të sigurt e ka edhe kavajasi Alked Çelhaka. Nga lojtarët e huaj, i vetmi që pritet të rikonfirmohet është Indio Oliviera.
Të paktën për momentin, pasi mund të mos ketë akord.
Janë thuajse të ikur dy brazilianët e tjerë, Quitera Gomes Cabral Nicholas dhe Marques Perdosa Joao Pedro.
Për ta vështirë të ketë hapësira në skuadrën e re. Burimet bëjnë me dije se pjesë e listës së lojtarëve që qëndrojnë janë edhe dy vlonjatët Mateo Qarri dhe Gesti Diamanti, të cilët shikohen si bazë për të ardhmen.
ÇËSHTJA E PANKINËS
Gjasat janë që bashkë me pjesën më të madhe të grupit të rikonfirmohet edhe trajneri Dritan Resuli. Më mbërritjen e Sinan Idrizit nga Turqia, këtë javë do t’i jepet drejtim edhe çështjes së trajnerit. Gjasat janë të shumta që të vijohet me Resulin.
“Trajneri erdhi, e takova, i thashë ato që kisha për t’i thënë. E pres tani të vijë të më kthejë përgjigje. Me t’u kthyer nga Turqia, do të zgjidhim çështjen e trajnerit.
Besoj se ka punuar, me sa kam marrë vesh, në drejtim të atyre që i kam kërkuar. Do takohemi prapë sapo unë të vij në Vlorë”, u shpreh pak ditë më parë për gazetën Idrizi.
E megjithatë, nuk ka një emër për zëvendësimin e Resulit, ndaj dhe peshorja anon më shumë drejt rikonfirmimit në krye të stolit të vlonjatit.
“NGEC” MERKATOJA
I vetmi lojtar në ardhje për të cilin flasin me bindje në klub se është mbyllur marrëveshja është Sokol Neziri. Mbrojtësi i djathtë që e mbylli sezonin në Krujë te Kastrioti, pritet që të mbërrijë në Vlorë për të firmosur në ditët në vazhdim.
Bie pista e Abdurraman Fangajt, ndonëse deri një muaj më parë ishte thuajse i kuqezinjve. Mbrojtësi shkodran pritej në Vlorë, por orët e fundit zgjodhi Egnatian.
Megjithatë, te Flamurtari presin disa lojtarë të tjerë. Mes tyre janë edhe pesë të huaj, konkretisht tre brazilianë dhe dy afrikanë./PANORAMA-SPORT/
