Tirana nis grumbullimin para sfidës me Dudelanzhin.
Prej dy ditësh bardheblutë janë të grumbulluar në një hotel të Tiranës, ndërsa nga ana tjetër skuadra ka vazhduar punën duke u stërvitur në “Selman Stërmasi”.
Kristian Toshevski është në rregull dhe do të luajë nga minuta e parë. Nga ana tjetër, klubi ka analizuar me vëmendje çdo ndeshje të Dudelanzhit dhe ka punuar i qetë me stafin e tij për të parë ku janë pikat e dobëta.
Në stërvitje ishin të gjithë, ndërsa nuk mungonte pothuajse asnjë.
FORMACIONI – Tirana pritet të luajë me një 11-she duke filluar nga Bekaj në portë, Toshevski, Behiratçe, Najdovski e Ismajlgeci në mbrojtje. Në mesfushë Aleksi, Totre e Limaj. Sulmi është i përbërë nga treshja Xhixha, Seferi dhe De Silva.
Po kështu, formacioni mund të ndryshojë nëse Shehi aktivizon Hilën në vend të Aleksit në mesfushë. Tirana kërkon më të mirën.
Në këtë moment që flasim, veç Likës, në stol janë Zhivanaj, Përgjoni, Hasani, Hila e lojtarë të tjerë që fare mirë mund të luajnë titullarë te bardheblutë.
Dy vite më parë Tirana në Europë kaloi dy ture. Në aventurën e fundit europiane, Tirana ka eliminuar Tbilisin. Në takimin e fundit në Champions League, ka shkëlqyer kundër serbëve të Crvenës.
Bardheblutë patën fat dhe me short shkuan në “play off”-in e Europa League ndaj Jang Bojsit.
Katër ndeshje miqësore zhvilloi Tirana në Turqi. Skuadra jonë u mund me Fenerbahçen e Dinamo Auto, më pas barazoi me Hermanshtadin dhe fitoi me Shkupin.
64 gola ka shënuar këtë sezon ekipi i Tiranës. Bardheblutë janë gjithashtu edhe skuadra që ka pësuar më pak gola këtë kampionat. Tirana do të luajë më datë 6 korrik në Luksemburg ndeshjen e parë me Dudelanzhin.
Sfida do të nisë në orën 19:30.
Nga ana tjetër, bardheblutë do të presin luksemburgasit në datën 12 korrik, ora 20:00, në “Air Albania”. Nëse kualifikohen, kampionët e Shqipërisë luajnë në turin e dytë me fituesin e çiftit Pjunik të Armenisë dhe CFR Kluzh të Rumanisë.
Nëse Tirana eliminohet nga Champions-i, në turin e dytë të Konferencë Ligës përballet me humbësin e ndeshjes Zrinjski-Sherif Tiraspol.
