Gjatë ditës së sotme me gjasë, Dajan Shehi pritet të prezantohet te Vllaznia. Burime të “Shkodra Sport” kanë mësuar se, prezantimi i tij dhe hedhja e firmës në kontratë është lënë për ditën e sotme.
Në fakt, nga sa mësohet në adresë të Shehit ka pasur edhe oferta të tjera, teksa ishte shumë pranë firmosjes me Egnatian. Megjithatë, duket se drejtuesit e Vllaznisë ishin më konkret dhe më këmbëngulës në transferimin e mbrojtësit elbasanas, i cili në këtë mënyrë do të provojë sërish veten me Vllazninë.
Dajan Shehi pritet të vendoset nën urdhërat e trajnerit të Vllaznisë, Mirel Josa, duke nisur nga seanca e rradhës stërvitore, e cila pritet të jetë të hënën ngaqë sot pasdite skuadra do jetë pushim e po ashtu edhe nesër.
Futbollisti elbasanas ka qenë pjesë e Vllaznisë për dy sezone me rradhë, ku fitoi edhe një Kupë Shqipërie, por më pas preferoi të kalojë te Partizani për sezonin e kaluar, prej të cilit u largua në janar, duke përfunduar në rradhët e Skënderbeut.
Maringlen ZHIVANI
