Skuadra shkodrane duket se po gëzon një formë shumë të mirë dhe natyrisht që do të tentojë të marrë një tjetër rezultat pozitiv edhe në ndeshjen e rradhës ndaj Kamzës.
Por nga ana tjetër tek Vllaznia duket se ka një shqetësim dhe ky është bërë publik pak minuta më parë edhe me një postim në faqen e tij zyrtare.
Ndër të tjera në të thuhet se “i frikësohen gjykimit”. Ja çfarë shkruhet në faqen e klubit shkodran:
“Ekipi i Vllaznisë ka mbyllur mesditën e sotme përgatitjet për sfidën e rradhës me Kamzën dhe më pas, ka marrë rrugën drejt qytetit të Durrësit ku do të qëndrojë deri pak orë para ndeshjes së nesërme.
Drejtuesit e klubit, futbollistët dhe stafi teknik janë të bindur se do ia dalin ta kalojnë me sukses edhe këtë sfidë e cila në pamje të parë konsiderohet e rëndësishme.
Një besim që vjen nga gjendja aktuale që po kalon skuadra, motivimi dhe bindja që ajo ka në vetvete.
Por nga ana tjetër, tek Vllaznia shqetësimi i vetëm që “ngacmon” të gjithë është problemi i gjykimit.
Duke qenë një takim i rëndësishëm, pjestarët e saj shpresojnë shumë që arbitrimi të jetë korrekt dhe i drejtë dhe të mos ndikojë në fatin e ndeshjes.
Nëse ndodh kjo, me shumë siguri, kuqeblutë do të marrin pikë ndaj Kamzës sepse është përgatitur një gjë të tillë”.
