Vllaznia nuk arriti të merrte asnjë pikë në ndeshjen e fundit kundër Laçit. Shkodranët u mundën në shifrat 1-0 nga kurbinasit, rezultat që komplikon disi renditjen e shkodranëve dhe ul dozat e optimizmit për një luftë të mundshme për titullin kampion. Por loja e shfaqur nga kuqeblutë pavarësisht rezultateve që kanë prodhuar ndeshjet ka qenë e një niveli shumë të mirë.
Kjo duket edhe nga tifozeria që po përkrah skuadrën jo vetëm në Shkodër, por edhe në çdo transfertë. Edhe dje në ndeshjen kundër Laçit, tribuna e rezervuar për miqtë ishte plot e përplot. Një atmosferë mjaft e bukur e krijuar nga mbështetësit shkodranë. Kjo duke vijuar edhe traditën e javëve të shkuara.
Ku tifozët kanë ndjekur hap pas hapi e qytet pas qyteti skuadrën e tyre të zemrës. Një organizim dhe atmosferë e tifozerisë shkodrane që mungonte prej shumë vitesh.
Shkodra njihet për tifozët e saj të zjarrtë që gjithmonë ndeshjet në transferta i kanë shndërruar sikur të ishin në “Loro Boriçi” falë pranisë së tyre të madhe në stadiume.
Një tifozeri që prej më shumë se dy dekadash pret të “shpërblehet” nga ekipi i tyre. Me një titull kampion që edhe kësaj rradhe duket i largët për Vllazninë. Megjithatë mbështetja dhe brohoritjet për shkodranët nuk do mungojnë asnjëherë në çdo cep të Shqipërisë ku mund të luajnë kuqeblutë.
Endri ÇINARI
