Sot, janë luajtur ndeshjet e javës së shtatë të Superiores. E fundit u luajt takimi mes Partizanit dhe Teutës, e mbyllur me shifrat 0-0. Pas përfundimit të kësaj jave, Newsport.al ka zgjedhur lojtarët që spikatën nga porta e deri në sulm.
Ne kete formacion, bejne pjese edhe tre futbolliste te Vllaznise te cilet kane spikatur ne fitoren e sotme ndaj Kastriotit dhe pikerisht Erdenis Gurishta, Aleksandar Isaevski dhe Demir Imeri.
Visar Bekaj – Nëse Tirana mori sot një fitore në Lac, padyshim meritë të madhe ka edhe portieri kosovar. “Gardiani” bardheblu u shndërrua në makth për sulmuesin e Laçit, Kyrian Nwabuezen. Amerikani nuk arriti të shënonte as përmes aksioneve, por edhe me penallti. Për gjatë gjithë lojës shtatlarti u vu në provë disa herë, mirëpo ishte i vendosur për t’i thënë “Jo” çdo kërcënimi kurbinas.
Erdenis Gurishta – Nuk ka vetëm shiritin e kapitenit, por dalëngadalë po bën edhe liderin te Vllaznia. Mbrojtësi i linjës te kuqeblutë sot ishte në ditën e tij më të mirë. Markon dhe sulmon si duhet në të njëjtën kohë. Organizon dhe motivon në mënyrën më të mirë skuadrën dhe në fund arrin të dalë me 3 pikë nga fusha e vështirë e Kamzës.
Altin Bytyçi – Vetëm 19 vjeç dhe tregon sikur ka një jetë që luan futboll. Shtatlarti i prapavijës së Kukësit i jep mesazh të qartë Skënder Gegës për të ardhmen. Pozicionet saktë dhe nuk lë hapësira për kundërshtarin. I vëmendshëm në aksionet e Bylisit duke zhvlerësuar çdo rrezik nga mallakastriotët.
Renato Arapi – Mbrojtje e garantuar me durrsakun në qendër të prapavijës. Sot, mbron mirë dhe arrin të neutralizojë çdo aksion të lojtarëve të trajnerit Ilir Daja. I jep ekipit të tij shpesh herë frymëmarrje dhe merr iniciativën për ta nxjerrë përpara. FItorja ishte shumë pranë, nëse Emiliano Vila do të kishte qenë i saktë nga pika e bardhë e 11-metërshit.
Aleksandar Isaevski – Luan qetë, markon dhe sulmon njëkohësisht në mënyrë të njëtrajtshme. Zbaton me përpikmëri çdo detyrë taktike të trajnerit Brdariç. Ndihmon maksimalisht skuadrën në arritjen e rezultatit pozitiv. Një afrim i goditur nga drejtuesit e Vllaznisë duke “blinduar” repartin e prapavijës.
Idriz Batha – Sot në fushë u duk “makineria” e sezonit të shkuar të Tiranës. Pjesëmarrës në çdo aksion, lidh bukur mbrojtjen me mesfushën dhe në fund vulos përmes një “perle” të tij me vlere 3 pikë. Gjirokastriti nuk ndalet së vrapuari për 90 minuta dhe në fund shpërblen ekipin e tij me një fitore të vështirë siç është transferta kurbinase.
Kristi Kote – Ndeshja e radhës që korçari bën një paraqitje të shkëlqyer. Nuk humb asnjë dyluftim në mesfushë dhe tregon rritje në lojën e tij. Ilir Daja duket se ka fituar një futbollist mjaft të rëndësishëm që premton shumë dhe për të ardhmen.
Dejvi Bregu – Vrapon përgjatë 90 minutave dhe është rrezik konstant për mbrojtjen e Partizanit. Arrin të fitojë një penallti, por për fatin e keq të skuadrës nuk shndërrohet në gol nga Vila. Krijon panik në zonën kundërshtare. Arrin të ndihmojë ekipin edhe në linjën difensive duke rikuperuar shumë topa në mesfushë.
Mario Gjata – Apolonia arriti të fitonte për herë të parë në këtë sezon futbollistik me Skënderbeun. Mjaftoi pikërisht goli i të riut Gjata për t’i dhënë 3 pikë mjaft të rëndësishme ekipit fierak. 20-vjeçari nuk fali para portës korçare duke shpërblyer më së miri besimin e trajnerit Nikolin Çoçli.
Demir Imeri – Shënon dhe vulos rezultatin në minutën e 43-të të takimit. Mjaft i rëndësishëm në fazën ofensive të shkodranëve duke qenë rrezik konstant për kundërshtarin. Pikë referimi për shokët e skuadrës duke shpërblyer si duhet besimin e tyre.
Agim Ibraimi – U afrua me bujë te Kukësi dhe menjëherë ka marrë rolin e liderit te verilindorët. Me shiritin e kapitenit në krah, sulmuesi i nënkampionëve arrin të realizojë një supergol. Duket se tanimë është dashuruar me “rrjetat” e Superiores, pasi ka shënuar golin e katërt në 7 javë të luajtura. Pa frikë, një nga lojtarët që do të konkurojë deri në fund për Këpucën e Artë.
TRAJNERI – NEVIL DEDE
Ndeshja e pestë në krye të pankinës së Tiranës. Duket dora e tij te bardheblutë, teksa sot arrin të fitojë një ndeshje mjaft të vështirë si transferta e Laçit. Ekipi vendoset mirë në fushë. Markon mirë dhe arrin të sulmojë duke shfaqur rrezikshmërinë e sulmuesve të saj. Fitorja e parë në krye të pankinës së Tiranës, pas një barazimi pa gola të arritur javën e shkuar në derbin ndaj Partizanit.
