Pak ditë më parë, të rinjtë e Fiorentinës arritën të mundnin në finalen e Kupës së Italisë të rinjtë e Torinos me rezultatin 1-2, duke arkivuar në këtë mënyrë trofeun e parë sezonal. Skuadra violë, që si kapiten ka mesfushorin shkodran të Shqipërisë U20, Erald Lakti vinte në këtë finale pasi eliminonte Interin në gjysmëfinale, aty ku titullar ka qenë edhe vetë Lakti.
Në një intervistë për ‘VipSport.al’, kapitenio shkodran i Fiorentinës ka rrëfyer emocionet e fitimit të një trofeu të tillë, duke e konsideruar të veçantë për vetë faktin se ishte trofeu i tij i parë me Fiorentinën. Ai shton se shpesh herë ëhstë stërvitur me ekipin e parë, duke shpresuar që të debutojë sa më shpejt.
Çfarë emocioni është të fitosh një trofe me Fiorentinën, duke qenë kapiten?
Jam shumë i lumtur që kam fituar këtë trofe shumë të rëndësishëm me Fiorentinën. Të jesh kapiten i një ekipi të tillë, është një nder i madh për mua. Jam shumë i lumtur!
Sa vlera ka për ty si kapiten ky trofe?
Ky trofe është shumë i rëndësishëm për mua personalisht, pasi është trofeu im i parë në këtë aventurë 10-vjeçare me fanellën violë.
A ke pasur kontakte nga ekipi i parë?
Kam bërë stërvitje shpesh herë me ekipin e parë dhe shpresoj që këtë vit të filloj të luaj.
Nëse jo te Fiorentina, ku mendon se do vazhdosh aventurën në të ardhmen?
Ende nuk di asgjë dhe nuk po mendoj për të ardhmen. Atë do ta shohim në fund të sezonit.
Një dedikim për trofeun e fituar?
Këtë trofe dua t’ia dedikoj familjes sime, tifozëve, qytetit të Firences dhe të gjithë shokëve të ekipit të cilët kanë kontribuuar për një sukses të tillë.
Objektivi i radhës për Laktin?
Objektivi im i radhës dhe dëshira e madhe që kam është që të debutoj me fanellën e ekipit të parë të Fiorentinës. /VipSport/
