Shkruar nga Endri ÇINARI
Vllaznia duket se ka gjetur një pikë referimi për formacionin e saj, teksa në prag të transfertës së kësaj jave ndaj Egnatias në Rrogozhinë, trajneri Csaba Laszlo pritet t’i besojë të njëjtit 11 futbollistë që siguruan fitoren 1-0 ndaj Dinamos. Kuqeblutë synojnë të ruajnë vazhdimësinë e rezultateve pozitive, ndërsa tekniku hungarez duket i prirur të mos bëjë ndryshime në formacionin titullar.
Në portë pritet të rikonfirmohet Jukaj, i cili ka shfaqur një formë të mirë gjatë periudhës së fundit. Pas paraqitjes pozitive ndaj Dinamos, gardiani shkodran shihet si favoriti kryesor për ta nisur nga minuta e parë edhe në Rrogozhinë, në një përballje ku skuadra do të ketë nevojë për siguri në prapavijë.
Sa i përket repartit të mbrojtjes, Laszlo pritet t’i besojë sërish dyshes Gurishta-Musta në qendër, ndërsa në krahë Bardhi dhe Avduli janë alternativat më të favorizuara për të qenë titullarë. Një repart që në ndeshjen e fundit arriti të mbante portën të paprekur dhe që tashmë do të ketë përballë një kundërshtar të vështirë si Egnatia.
Në mesfushë, dyshja Mehmeti-Dros pritet të formojë digën para mbrojtjes, me Qaton të pozicionuar më i avancuar në këtë repart. Një skemë që synon të ruajë ekuilibrat mes fazës mbrojtëse dhe asaj sulmuese, duke i dhënë Vllaznisë mundësinë të rivalizojë një skuadër që në fushën e saj është gjithmonë e vështirë për t’u përballuar.
Ndërkohë, në krahët e sulmit, Uldedaj dhe Murataj shihen si futbollistët më të avantazhuar për ta nisur ndeshjen nga minuta e parë. Të dy pritet të kenë një rol të rëndësishëm në krijimin e rasteve dhe në mbështetjen e sulmuesit kryesor, Bekim Balaj, i cili do të jetë sërish pika e referimit në majën e ofensivës kuqeblu.
Për Vllazninë, sfida ndaj Egnatias përfaqëson një tjetër provë të rëndësishme në kampionat. Pas suksesit ndaj Dinamos, shkodranët kërkojnë të konfirmojnë se fitorja e fundit nuk ishte një episod i izoluar, por pikënisja e një serie pozitive rezultatesh. Për këtë arsye, Laszlo duket se do të zgjedhë vazhdimësinë, duke i besuar grupit që i dha tri pikët e para të sezonit.
