Ndonëse me 10 vetë për disa minuta, Vllaznia U17 ia ka dalë që të fitojë ndaj Internacional dhe të kualifkohet për në çerekfinale të Kupës së Shqipërisë. Kuqeblutë e drejtuar nga trajneri Brikeno Bizi kanë fituar 2-1 në një ndeshje shumë të luftuar që ka patur brenda saj edhe shumë kartona, madje edhe të kuq.
Duhet thënë se kanë qenë tiranasit e “Inernacional” që shënuan të parët me anë të Nergutit në minutën e 12-të. Një gol disi i papritur që i gjeti edhe të papërgatitur shkodranët megjithatë ata ditën të reagojnë.
Loja është e fortë dhe ka edhe kartona, madje më të shumtë ata janë për këta të fundit teksa ndëshkohen njëri pas tjetrit me të verdha Muliu, Sufaj e Tinaj. Por në minutën e 36-të do të ishte Paloka ai që do të shënonte golin e barazimit.
Tre minuta më vonë, Vllaznia do të fitonte një 11-metërsh të cilin do ta kthente në gol Pusi. Me këtë rezultat do të mbyllej pjesa e parë. Në të dytën pavarësisht përpjekjeve të të dy ekipeve nuk do të kishte gola të tjerë.
Ndërkohë në minutën e 65-të Tinaj i ekipit shkodran do të ndëshkohej me kartonin e dytë të verdhë, rrjedhimit edhe të kuqin më pas duke lënë skuadrën me një futbollist më pak në fushën e lojës. Por gjithsesi, Vllaznia U17 e ruajti avantazhin duke fituar 2-1 dhe duke u kualifikuar për në çerekfinale të Kupës.
Në turin tjetër, ajo do të ndeshet me Tiranën, ekip që kryeson kampionatin. Kjo e fundit sot fitoi vetëm me 11-metërsha ndaj Akademisë së Futbollit.
© shkodrasport.com
