Klubi Vllaznia dhe tifozët e kësaj skuadre kanë kërkuar që hyrja e tyre të jetë falas për ndeshjen më të rëndësishme të sezonit, atë që do të zhvillojnë ditën e shtunë ndaj Tiranës dhe ajo është miratuar thuajse krejtësisht. Themi kështu sepse FSHF ka vendosur të hapë dyert e “Loro Boriçit” por jo për të gjitha tribunat. 13 mijë vende që i takojnë tribunave C, D dhe E, do jenë falas ndërkohë që vetëm tribuna qendrore do jetë me pagesë. Kjo bëhet e ditur nga vetë klubi shkodran në faqen e tij zyrtare. Po aty, u bëhet thirrje tifozëve kuqeblu që të mos mungojnë në këtë sfidë shumë të rëndësishme e cila është vendimtare për të ardhmen e skuadrës së tyre në Superligë. Ja çfarë shkruhet në faqen e klubit kuqeblu:“Bëjmë të ditur për të gjithë të interesuarit se Federata Shqiptare e Futbollit ka dhënë Ok-in që hyrja e tifozëve në stadiumin “Loro Boriçi” për ndeshjen e kësaj jave Vllaznia- Tirana, të jetë falas. Kjo do të ndodhë për tribunat C, D dhe E, ndërkohë që i vetmi përjashtim është tribuna qendrore, pra për tribunat A, B dhe VIP ku hyrja e tifozëve do të jetë me pagesë. KF Vllaznia falenderon institucionin e futbollit shqiptar që miratoi këtë kërkesë tonën për të mundësuar hyrjen e tifozëve falas në këtë ndeshje shumë të rëndësishme të kampionatit. Tashmë është në dorën e tyre të jenë të pranishëm në stadium ditën e shtunë në orën 17.00 për të mbështetur kuqeblutë. Natyrisht që jemi të bindur se kjo mbështetje nuk do të mungojë. Vllaznia ka nevojë për brohoritjet tuaja dhe prandaj ju ftojmë që të jeni në pranishëm në “Loro Boriçi” në këtë 90 minutësh të fundit të këtij kampionati.
Forca Vllaznia”!
