Vonesat e lojës janë ato të cilat shpesh shkatërrojnë bukurinë e një ndeshje futbolli. Dhe një pjesë e madhe e tyre vijnë nga dëmtime të njëpasnjëshme, me stafet mjekësore që hyjnë në fushë duke vonuar rinisjen e takimit. FIFA, duket se më në fund ka gjetur zgjidhjen.
Sipas mediave ndërkombëtare, Pierluixhi Kolina, i cili është përgjegjësi i arbitrimit në FIFA, ka ideuar një rregull të ri për rastet kur lojtarët kërkojnë ndihmën mjekësore në fushë. FIFA ka çuar për miratim te IFAB, organizata që cakton rregulloret e futbollit, një rregull të ri ku për çdo lojtar që kërkon ndihmën mjekësore, të jetë i detyrueshëm qëndrimi të paktën 2 minuta jashtë fushës së lojës pasi ka dalë nga rrethimi i saj.
Nga ky rregull përjashtohen portierët, por sa i përket pjesës tjetër, FIFA mendon se në këtë mënyrë do të shmangen maksimalisht mashtruesit që kërkojnë të vonojnë lojën duke trilluar dëmtime. Ata do të lënë ekipin e tyre dy minuta me një lojtar më pak, ndaj numri i simuluesve do të ulet ndjeshëm.
Rregulli do të vihen në aplikim në disa kampionate arabe dhe në MLS në sezonin e ardhshëm si testim, por FIFA po mendon që ta vërë në zbatim sa më shpejt në të gjithë botën.
