Trajneri italian Diego Longo, 49-vjeçari nga Genova, ka kritikuar ashpër futbollin shqiptar në një intervistë për “Gazzetta dello Sport”. Me një karrierë që përfshin vende si Rumania, Greqia, Arabia Saudite, Ukraina dhe së fundmi Gjeorgjia, Longo ka treguar episodet që e kanë bërë të dyshojë mbi drejtësinë në Superligën shqiptare, gjatë kohës kur drejtonte Kukësin nën presidencën e Safet Gjicit.
“Si është kampionati shqiptar? Liga më e korruptuar në botë,” tha Longo. “Marrëdhëniet midis klubeve dhe institucioneve të futbollit janë shumë të ndërlikuara. Kam parë shumë gjëra të papranueshme, por ka një episod që i tejkalon të gjitha të tjerat.”
Ai rrëfeu një moment të veçantë gjatë vitit të parë me Kukësin, në një ndeshje vendimtare për kualifikimin në Europë kundër Partizanit: “Një ditë para ndeshjes, na morën fushën e stërvitjes, duke thënë se kishin organizuar një ndeshje për ekipin e tyre të të rinjve. Por më e keqja ndodhi të nesërmen. Gjatë ndeshjes, VAR u shkëput për 15 minuta, ‘probleme teknike’ sipas gjyqtarit. Gjatë atij momenti na u mohuan dy penallti të hapura dhe një penallti e rreme iu dha Partizanit, i cili fitoi dhe u kualifikua për në Europë. Pas fishkëllimës së fundit, i thashë presidentit tim se situata ishte e papranueshme. Ai më tha se ishin dakord me këtë. Një vit më vonë, u arrestua.”
Pas Kukësit, aventura e Longos në Shqipëri vazhdoi te Flamurtari në Kategorinë e Parë dhe më pas te Teuta. “I udhëhoqa ekipin drejt fazës eliminatore, por humbëm për shkak të një gabimi të portierit në minutën e fundit. Në Teutë nuk kishte ambiente apo shkolla sportive, ndaj u largova dhe u ktheva në Itali,” tregoi trajneri italian.
Sezoni i fundit i Longos si trajner ishte më i suksesshmi: me Dila Gorin në Gjeorgji, fitoi Kupën dhe Superkupën e vendit, duke vulosur një eksperiencë të pasur jashtë Shqipërisë.
