Carlo Ancelotti po përgatit ndryshime të rëndësishme te Brazili në prag të ndeshjes ndaj Haitit, pas një paraqitjeje zhgënjyese në pjesën e parë kundër Marokut, ku skuadra vuajti ndjeshëm dhe vetëm në pjesën e dytë e rriti nivelin, por pa shmangur humbjen.
Tekniku italian është kritikuar për mënyrën si u organizua skuadra në atë takim, dhe tani synon të ndërhyjë si në mbrojtje ashtu edhe në mesfushë, duke kërkuar më shumë ekuilibër dhe kontroll loje. Objektivi është i qartë: tri pikët ndaj Haitit për të mos komplikuar rrugëtimin në Botëror.
Lajmi më pozitiv për Ancelotti-n është rikthimi i Neymar-it në grup. Sulmuesi, golashënuesi më i mirë në historinë e Brazilit, shihet si një faktor i rëndësishëm jo vetëm teknikisht, por edhe psikologjikisht për skuadrën. Prania e tij në fushë pritet të ndikojë edhe te kundërshtarët.
Në mbrojtje, dilemat janë të shumta. Performanca e dobët e disa lojtarëve në krahë ka hapur diskutime, ndërsa Ancelotti po shqyrton ndryshime në pozicionime për të shmangur gabimet e ndeshjes së fundit. Edhe qendra e mbrojtjes ka marrë kritika për mungesë përqendrimi në momentet vendimtare.
Në mesfushë, Casemiro është nën presion për shkak të formës jo optimale, ndërsa alternativa të tjera po vlerësohen për më shumë freski dhe intensitet. Nga ana tjetër, Bruno Guimarães mbetet një nga lojtarët më të sigurt në formacion, falë energjisë dhe cilësisë që sjell në lojë.
Në repartin ofensiv, Ancelotti po shqyrton edhe opsione të reja për sulmin qendror, me mundësinë e ndryshimit të skemës. Nuk përjashtohet as një sistem më fleksibël që i lejon Brazilit më shumë kontroll në mesfushë dhe përdorim më efikas të ‘yjeve’ si Neymar, Vinicius dhe Raphinha.
Ndaj Haitit, Brazilit i kërkohet vetëm fitorja, ndërsa Ancelotti synon të përdorë këtë ndeshje si pikë kthese për të rregulluar ekuilibrat dhe për të rikthyer identitetin e një prej skuadrave më të forta të Botërorit.
