Eliminimi në çerekfinale të Kupës së Botës 2026 ishte një goditje e rëndë për Norvegjinë dhe Erling Haalandin.
Pas humbjes 2-1 nga Anglia, sulmuesi i Manchester Cityt e pranoi se kishte vuajtur shumë fizikisht gjatë ndeshjes, duke theksuar se temperaturat e larta dhe lagështia e madhe në Miami e kishin lënë pa energji.
“Ishin ndoshta gjashtë javët më të bukura të jetës sime. Tani është e vështirë të flas, sepse jam shumë i zhgënjyer, por këto ditë do t’i mbaj mend përgjithmonë”, u shpreh Haaland pas ndeshjes.
Pavarësisht eliminimit, kapiteni i norvegjezëve u shpreh krenar për rrugëtimin e kombëtares së tij në këtë Botëror.
“Shpresoj që vendi ynë të jetë krenar për atë që kemi bërë. Edhe ne duhet të jemi krenarë, por në të njëjtën kohë duhet të mësojmë nga ndeshje si kjo. Në çerekfinale janë detajet ato që e bëjnë diferencën dhe këtë herë ato nuk ishin në anën tonë”, deklaroi ai.
Haaland zbuloi gjithashtu se kushtet atmosferike ndikuan ndjeshëm në paraqitjen e tij, duke e konfirmuar edhe arsyen pse u zëvendësua gjatë pjesës së dytë.
“Lagështia ishte jashtëzakonisht e lartë. Ishte një ndeshje shumë e vështirë. Mund ta them sinqerisht: isha plotësisht pa energji”, përfundoi sulmuesi norvegjez, i cili ia dha lamtumirën ëndrrës për ta çuar Norvegjinë në gjysmëfinalen e parë të historisë së saj në një Kupë Bote.
