Shkruar nga Endri ÇINARI
Vllaznia duket se po i afrohet gjithnjë e më shumë kompletimit të skuadrës për sezonin e ri. Pas afrimeve të fundit, kuqeblutë kanë arritur të mbulojnë pothuajse plotësisht repartin e mbrojtjes dhe atë të mesfushës, duke i dhënë trajnerit Edi Martini më shumë alternativa dhe konkurrencë në këto sektorë. Drejtuesit kanë punuar me kujdes gjatë merkatos, duke sjellë futbollistë që pritet të rrisin cilësinë dhe ekuilibrin e ekipit.
Megjithatë, puna në merkato nuk konsiderohet ende e mbyllur. Prioritetet e klubit tashmë janë përqendruar në dy pozicione kyçe, porta dhe sulmi, aty ku Vllaznia kërkon të bëjë goditjet e fundit për të kompletuar organikën. Synimi është afrimi i një portieri që të garantojë siguri mes shtyllave, por edhe i një sulmuesi me cilësi dhe instinkt goli, i aftë të bëjë diferencën në momentet vendimtare të sezonit.
Burime pranë klubit bëjnë me dije se drejtuesit kuqeblu po lëvizin intensivisht në treg për të gjetur profilet e duhura. Nuk bëhet fjalë vetëm për plotësimin e numrave në skuadër, por për futbollistë që mund të rrisin menjëherë nivelin e ekipit dhe të jenë titullarë të padiskutueshëm. Pikërisht për këtë arsye, Vllaznia nuk dëshiron të nxitohet, duke preferuar të presë lojtarët e duhur sesa të bëjë afrime vetëm për të mbyllur merkaton.
Edhe trajneri Martini pret me interes përforcimet e fundit, pasi me kompletimin e portës dhe repartit ofensiv do të ketë në dispozicion një skuadër më të balancuar dhe më konkurruese. Kampionati po afron dhe objektivat e Vllaznisë mbeten të larta, ndaj dy lëvizjet e fundit në merkato mund të rezultojnë vendimtare për forcën që do të shfaqin shkodranët gjatë sezonit 2026-2027.
Tashmë topi është në fushën e drejtuesve, të cilët synojnë t’i dhurojnë tifozëve edhe dy afrime cilësore për të mbyllur një merkato që, të paktën në letër, do ta bënte Vllazninë një nga skuadrat më të kompletuara dhe më pretendente për të luftuar në majën e futbollit shqiptar.
Burimi: Gazeta “Shkodra Sport”
