Shkruar nga Endri ÇINARI
Mbrojtja po kthehet në shqetësimin kryesor të Vllaznisë në këtë nisje të kampionatit. Pas pesë javëve të para, kuqeblutë kanë pësuar plot 10 gola, duke u shndërruar në skuadrën më të ndëshkuar të Superiores në këtë aspekt. Një shifër që tregon qartë problemet e repartit defensiv dhe që po kushton pikë në startin e sezonit.
Por 10 golat e pësuar në pesë ndeshje nuk janë thjesht një statistikë negative e momentit. Sipas të dhënave historike të kampionateve shqiptare, që nga viti 1930, kur nisi kampionati kombëtar, Vllaznia nuk kishte regjistruar asnjëherë një bilanc të tillë pas pesë ndeshjeve të para. Një rekord që sigurisht nuk do të kishte dashur ta vendoste emri i klubit shkodran.
Mesatarja është po aq shqetësuese: dy gola të pësuar për çdo 90 minuta. Për një skuadër që synon të ndërtojë një sezon konkurrues, kjo është një barrë e madhe, pasi edhe momentet e mira në fazën ofensive zhvlerësohen nga lehtësia me të cilën kundërshtarët gjejnë rrugën drejt portës.
Në katër javët e para, Vllaznia kishte pësuar 8 gola, ndërsa disfata 0-2 ndaj Teutës në “Loro Boriçi” e çoi totalin në 10. Mungesa e vazhdimësisë dhe e sigurisë në prapavijë është bërë tashmë një nga problemet më të dukshme të skuadrës së Edi Martinit, e cila ende nuk ka arritur të regjistrojë një ndeshje pa pësuar gol.
Kjo situatë e vendos mbrojtjen përballë një detyre të menjëhershme: të ndryshojë trendin. Nëse kuqeblutë vazhdojnë të pësojnë me këtë ritëm, çdo objektiv i sezonit rrezikon të vështirësohet ndjeshëm, pavarësisht se sa potencial mund të ketë skuadra në repartet e tjera.
Për 9 herë kampionët e vendit, alarmi është i ndezur që në javët e para. Sezoni është ende i gjatë dhe ka kohë për korrigjime, por shifrat e mbrojtjes kërkojnë reagim të shpejtë. Përndryshe, Vllaznia rrezikon ta komplikojë seriozisht sezonin që në start, duke e bërë edhe më të vështirë rrugën drejt objektivave të saj.
Burimi: Gazeta “SHKODRA SPORT”
