Trajneri i Kombëtares U-19 të Shqipërisë Fatjon Tafaj në një intervistë të gjatë të dhënë për kanalin e FC Inter ka vlerësuar talentin shqiptar me origjinë nga Shkodra Alen Vukaj. Sulmuesi i cili po spikat, si me moshat e zikaltërve, ashtu edhe me ngjyrat kuqezi, ka performuar mirë në fushë duke rënë edhe në sytë e UEFa-s.
Në mesin e shumë çështjeve që u përmendën nga kjo intervistë, Tafaj u shpreh se Vukaj ka cilësi të mira dhe potencial për ta shfrytëzuar. Por, i duhet ende shumë kohë që të arrijë nivelin që ai dëshiron të ketë. Më tej, trajneri i moshave të kuqezinjve, theksoi se Aleni i kujton Jamal Musialën e Bayern Munich, ndërsa shton se, nëse vijon me këto performanca progesive, nuk do të jetë e vonë dita që do ta shohim në ekipin e parë të Interit.
INTERVISTA:
Çfarë menduat herën e parë që patë Vukajn të luante me moshat e Shqipërisë?
Të them të drejtën, përshtypja ime e parë për Alenin nuk ishte plotësisht ajo që prisja. Në atë periudhë sapo isha emëruar trajner i ekipit dhe, gjatë punës së parë të bërë së bashku në stërvitje, mënyra se si u paraqit nuk ishte në nivelin e pritshmërive që kisha ndaj tij.
Duhet marrë parasysh edhe fakti që Aleni vinte nga një dëmtim, rrethanë që mund të ketë ndikuar në gjendjen e tij fizike dhe në ritmin e stërvitjeve. Në ndeshjen e parë i dhashë pak hapësirë dhe pati në dispozicion vetëm pak minuta. Në të dytën, përkundrazi, prania e tij në fushë pati një ndikim dukshëm pozitiv dhe nisa të kuptoja më mirë cilësitë dhe potencialin e tij.
Që nga ai moment paraqitjet e tij kanë qenë në rritje të vazhdueshme dhe sot mund të them se është një lojtar që ka fituar vlerësimin dhe besimin tim.
A është ai një lider që e tërheq ekipin tuaj?
Mendoj se Alen është një lojtar i aftë të ndikojë pozitivisht te skuadra, jo vetëm falë cilësive të tij individuale, por edhe për mënyrën se si e kupton dhe e interpreton lojën. Është një futbollist që merr përgjegjësitë e veta, nuk fshihet në momentet e vështira dhe ka aftësinë të marrë iniciativa për të ndihmuar ekipin.
Me ju ka 7 ndeshje dhe 4 asiste. Cilat janë karakteristikat e tij më të mira?
Sigurisht, është një lojtar që ka dhënë një kontribut të rëndësishëm për Kombëtaren U-19. Ka një nivel cilësor shumë të lartë dhe do ta konsideroja si një nga lojtarët teknikisht më të fortë të ekipit tonë. Di t’i zgjidhë shumë mirë situatat një kundër një dhe një kundër dy dhe është shumë inteligjent.
Për stilin e tij të lojës, me cilin futbollist të famshëm do ta krahasonit?
Nuk është e lehtë për mua të bëj krahasime mes futbollistëve, sidomos kur bëhet fjalë për një lojtar kaq të ri. Megjithatë, duke marrë parasysh nivelin e tij teknik, inteligjencën taktike dhe aftësinë për të zgjidhur situatat individuale, sidomos në duelet një kundër një dhe një kundër dy, mund të them se paraqet karakteristika të ngjashme me lojtarë si Jamal Musiala. Për këtë nuk kam asnjë dyshim.”
A jeni i lumtur që Aleni luan në një ekip të të rinjve (Primavera) kaq të rëndësishëm si ai i Interit?
Sigurisht, jam shumë i lumtur dhe i kënaqur që Aleni është pjesë e një klubi me një histori dhe prestigj kaq të rëndësishëm si Interi. Mendoj se kjo është një mundësi fantastike për rritjen e tij, jo vetëm nga ana teknike dhe taktike, por edhe profesionale.”
Në të ardhmen do të donit të luante në Serie C, me ekipin e dytë zikaltër, apo më mirë të transferohej në kampionate më konkurruese?
Mendoj se në këtë moment gjëja më e rëndësishme për Alenin është të hedhë hapat e duhur për rritjen e tij. Është një lojtar i pajisur me talent dhe cilësi të mira, por duhet të bëjë zgjedhjet e duhura, duke marrë parasysh mundësinë për të luajtur rregullisht, për të fituar përvojë dhe për t’u përballur me një nivel më të lartë konkurrence.
Të qëndrojë te Interi dhe të ketë mundësinë të luajë me ekipin e dytë në Serie C do të ishte një alternativë shumë e mirë, sepse do t’i lejonte të mbetej nën vëmendjen e ekipit të parë zikaltër. Megjithatë, nuk do ta konsideroja si mundësinë e vetme. Edhe transferimi në një kampionat më konkurrues, ku të mund të gjejë hapësira dhe të ketë një rol të rëndësishëm, do të ishte pozitiv.
Për mua, gjëja më e rëndësishme nuk është se ku luan, por që të hedhë hapin e duhur në momentin e duhur. Aleni ka talent dhe potencial, ndaj duhet të vazhdojë të punojë dhe ta ndërtojë karrierën e tij me durim dhe duke bërë zgjedhje të matura.”
A mendoni se një ditë mund ta shohim titullar me ekipin e parë të Interit?
Aleni ka shumë talent dhe potencial, por vetëm talenti nuk mjafton për të arritur në nivelet më të larta. Duhet të punojë fort, të bëjë sakrifica dhe të garantojë vazhdimësi në rrugëtimin e tij të rritjes. Nëse arrin t’i kombinojë të gjitha këto me cilësitë që zotëron, besoj se mund të krijojë mundësinë që një ditë të arrijë edhe në ekipin e parë të Interit.
Thuhet se Maran po e vëzhgon tashmë. A është e vërtetë?
Me Maranin dhe stafin e tij kemi një bashkëpunim të shkëlqyer dhe jemi në komunikim të vazhdueshëm. Stafi i tij është i informuar në mënyrë të detajuar jo vetëm për Alenin, por për të gjithë lojtarët e ekipit që kanë potencial, sepse i konsiderojmë një pjesë shumë të rëndësishme të së ardhmes së futbollit shqiptar. Natyrisht, gjithçka do të varet nga puna, rritja dhe vazhdimësia që do të tregojnë vetë futbollistët.
Ku mendoni se mund të arrijë si futbollist?
Siç e kam theksuar tashmë, Aleni ka talentin dhe cilësitë e nevojshme për të ndërtuar një karrierë të suksesshme, por duhet shumë punë dhe përkushtim. Në fund, gjithçka do të varet nga ai dhe nga mënyra se si do të dijë ta shfrytëzojë potencialin e tij.
