Shkruar nga Gjergj KOLA
Dita e sotme është e veçantë për ish-atletin dhe ish-gjimnastin kampion, Bashkim Paçrami. Ai, së bashku me njerëzit e tij më të dashur, do të festojë ditëlindjen, pasi pikërisht sot mbush 83 vjeç.
Bashkim Paçrami ka lindur më 10 shtator 1943 në Shkodër, në një familje me traditë sportive. Babai i tij, Aliu, ka qenë futbollist i Vllaznisë në vitet ’30 dhe kjo traditë do të vazhdonte edhe më pas, pasi edhe pjesëtarë të tjerë të familjes do t’i kushtoheshin sportit.
Bashkimi e nisi rrugëtimin sportiv me gjimnastikën, ku arriti nivele të larta falë aftësive dhe përgatitjes së tij. Ai mori pjesë në disiplinën e gjashtëgarëshit gjimnastikor në vitet 1959-1960, ndërsa ekzekutonte me mjeshtëri ushtrimet në unaza dhe në kalë me doreza, duke fituar edhe Kategorinë e Parë Sportive.
Në vitin 1961 vendosi ta lërë gjimnastikën dhe t’i përkushtohet atletikës. Gara e tij e preferuar do të ishte kërcimi me shkop, disiplinë në të cilën do të jepte gjithmonë më të mirën e tij.
Bashkim Paçrami u bë rekordmen i të rinjve në vitet 1961 dhe 1963, ndërsa në vitin 1965, në Tiranë, vendosi rekord edhe në kategorinë e të rriturve, duke kaluar lartësinë 3.75 metra me shkop metalik.
Por sukseset e tij nuk u kufizuan vetëm në këtë disiplinë. Ai ishte gjithashtu pjesë e ekipit rekordmen të vendit në garën 4 x 100 metra, me kohën 42 sekonda e 2 të dhjetat.
Paçrami garoi edhe në 100 metra dhe ishte ndër më të mirët e Shqipërisë, duke konkurruar me emra të njohur të atletikës shqiptare si Tomi Stefallari i Korçës, Çlirim Balluku i Dinamos, Besim Qyqja i Tiranës, Rasim Kraja i Vllaznisë e të tjerë, të gjithë atletë të kombëtares shqiptare dhe anëtarë të ekipit kombëtar.
Edhe Bashkimi do të arrinte normën në 100 metra, me kohën 10 sekonda e 7 të dhjetat, duke fituar titullin “Mjeshtër Sporti”.
Pas vitit 1970 u tërhoq nga sporti i garave për arsye shëndetësore, por nuk u shkëput asnjëherë prej tij. Vijoi të ishte i lidhur me sportin përmes profesionit të tij, duke dhënë mësim në shkollat e qytetit të Shkodrës si specialist i gjimnastikës dhe atletikës.
Për kontributin e tij ndër vite, Bashkim Paçrami është nderuar nga Bashkia Shkodër me titullin “Nderi i Sportit Shkodran”. Një vlerësim më shumë për një njeri që ka dhënë shumë për sportin e qytetit dhe që meriton respektin e të gjithëve.
Por historia sportive e familjes Paçrami nuk përfundon vetëm me Bashkimin.
Ali Paçrami, babai i tij, ka qenë futbollist. Motra e Bashkimit, Safetia, ka qenë atlete, ndërsa vëllai i tij, Fatmiri, ka luajtur futboll me Vllazninë dhe është shpallur “Mjeshtër Sporti”. Më pas, edhe vajza e Bashkimit, Blerina, do të bëhej një gjimnaste shumë e mirë.
Dhe jo vetëm kaq. Edhe dhëndri i Bashkimit, Brahim Syka, ka qenë një prej çiklistëve më të mirë të Shqipërisë.
Një familje e tërë e lidhur me sportin, me emra që kanë lënë gjurmë në disiplina të ndryshme dhe që kanë kontribuar në pasurimin e traditës sportive shkodrane.
Më 24 qershor të këtij viti, Presidenti i Republikës, Ilir Meta, e nderoi Bashkim Paçramin me titullin e lartë “Kalorës i Urdhrit të Flamurit”, pikërisht për kontributin e tij të madh ndër vite në sport.
Për të gjitha këto, Bashkim Paçrami ka plotësisht të drejtë të krenohet në këtë përvjetor të lindjes. Dhe natyrisht, edhe Shkodra ka arsye të jetë krenare për një prej njerëzve që i ka shërbyer sportit të saj me pasion dhe përkushtim.
Në këtë ditë të veçantë, Gazeta “SHKODRA SPORT” i uron Bashkim Paçramit: Edhe 100 vite të tjera të lumtura!
Shëndet, gëzim dhe sa më shumë ditëlindje të tjera pranë familjes dhe njerëzve të tij të dashur!
